Bismillah, alhamdulillah, us-salatu was-salamu ‘ala Rasulillah, amma ba’d.

Aslida siz uyni sotib olganingizdan keyin, u endi sizning mulkingiz bo‘ladi. Qarindoshingizning hozir sizdan uyni qaytarib olmoqchi bo‘lishi noto‘g‘ri. Bu — sizning mulkingizni tortib olish, ya’ni zulm bo‘ladi.

Uy qimmat bo‘ladimi, arzon bo‘ladimi — u sizga o‘tgan. Siz esa kelishilgan narxda pulni bo‘lib-bo‘lib to‘layapsiz. Agar uyingiz qimmatlashib, qarindoshingiz “bo‘ldi, endi bera olmaysan” desa ham, uyni sotib, kelishilgan narxdagi pulni unga topshirasiz. Narx oshib ketgan bo‘lsa, ortiqcha pul sizga qoladi.

Siz shu vaqtgacha bergan 800 ming rublingiz esa, har bergan vaqtingizdagi dollar kursi bilan hisoblanadi. Masalan, qaysi kuni qancha bergan bo‘lsangiz, o‘sha kungi dollar kursi asosida hisoblash kerak.

Aytaylik, bir kunda 7000 rubl bergansiz, o‘sha kunda dollar kursi bo‘yicha bu 100 dollar bo‘lgan. Shunday qilib, 800 ming rublingiz umumiy hisobda 10,000 dollardan oshib ketgan bo‘lishi mumkin.

Agar oldindan “pulni dollarga nisbat berasan” deb kelishilgan bo‘lsa, siz har to‘lagan pulingizni o‘sha kungi dollar kursi asosida hisobga olish huquqidasiz. Shu asosda qarzingizning qancha qismini to‘laganingiz aniqlanadi.

Misol uchun, uy 100,000 dollarga kelishilgan bo‘lsa, hozirgacha siz 12,000 yoki 13,000 dollar to‘lagan bo‘lishingiz mumkin. Qolgan qismini esa bo‘lib-bo‘lib to‘lashingiz kerak.

Agar qarindoshingiz: “Sen baribir to‘lay olmaysan,” deb uyni sizdan qaytarib olmoqchi bo‘lsa, bu – bosqinchilik hukmiga kiradi. Uyni sotmoqchi bo‘lsa, siz rozilik bildiring va:

“Uy sotilsin, men kelishilgan summani to‘layman, ortig‘i qolsa – o‘zimga,”
— deng.

Aks holda, bu ish adolatdan chiqadi.

Allohu a’lam.