Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Agar aytilganidek hammaning roziligi bo‘lsa, bu to‘g‘ri va joiz hisoblanadi. Siz o‘rningizga odam qo‘yibsiz, yana o‘zingiz ham uzoqdan, masofadan turib internet orqali ishga hissa qo‘shyapsiz. Demak, sheriklikdagi ishtirokingiz butunlay uzilib qolmagan. Shuning uchun foydani kelishilgan tartibda bo‘lishda zarar yo‘q.

Foydani qanday taqsimlash masalasi sheriklarning kelishuvi asosida belgilanadi. Agar barcha rozi bo‘lsa, bu shariatga muvofiqdir. Alloh ishlarga baraka bersin. Ishni boshlaganingizda ham Alloh baraka berganini ko‘ryapsiz. Bu shuni ko‘rsatadiki, sheriklikda vafodorlik va samimiyat bo‘lsa, Alloh baraka beradi.

Sheriklikda katta hikmat bor. Rasululloh ﷺ aytganlaridek, bir idishda ko‘pchilik qo‘l cho‘zib ovqatlansa, baraka bo‘ladi. Xuddi shunday, sheriklar uchta bo‘lsa – to‘rtinchisi Alloh bo‘ladi, to‘rtta bo‘lsa – beshinchisi Alloh bo‘ladi. Ya’ni Alloh sherikchilikka baraka beradi.

Ammo agar sheriklardan kimdir xiyonat qilsa, hisobni yashirsa, aldashni boshlab yuborsa, Alloh barakani olib qo‘yadi. Alloh chiqib ketgan joyga shayton kiradi. Shunda sheriklik buziladi. Shuning uchun halollik va ochiqlikni saqlash, birovning haqiga tajovuz qilmaslik, sheriklar o‘rtasida ishonchni mustahkam tutish eng muhim narsadir.

Demak, hozirgi holatingiz – sheriklikni davom ettirish, masofadan turib hissa qo‘shish, o‘rningizga ishchi qo‘yish va foydani kelishilgan tartibda uchga bo‘lish – joiz va to‘g‘ri hisoblanadi.

Vallohu a’lam.