Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Agar bu savatlar haqiqatan ham isrof maqsadida ishlatilayotgan bo‘lsa, unda u holda bunga vositachi bo‘lish, ya’ni isrofga yordam berish maqbul bo‘lmaydi. Ammo shariat bunday hollarda odamlarning tirikchilik eshiklarini butunlay yopib qo‘ymaydi.

Masalan, bir to‘yda isrof bo‘lyapti, deb qassobga “go‘sht sotma” deb aytmaymiz. Chunki u o‘zining halol kasbi bilan rizq topyapti. Xuddi shuningdek, savat yasovchi ham halol mehnat bilan savat tayyorlab, uni ijaraga berayotgan bo‘lsa — bu o‘z-o‘zidan harom bo‘lib qolmaydi.

Bu yerda asosiy masala: bu savatlar qanday niyatda va qanday ko‘lamda ishlatilayapti? Agar haddan tashqari dabdabaga, keraksiz ko‘rsatishga, hasad uyg‘otishga sabab bo‘layotgan bo‘lsa – bu isrofga kiradi va isrof esa Qur’onda qoralangan.

إِنَّ ٱلْمُبَذِّرِينَ كَانُوٓا۟ إِخْوَٰنَ ٱلشَّيَـٰطِينِ 

“Isrof qiluvchilar shaytonlarning birodarlaridir.” (Isro: 27)

Shuning uchun, bu holatda muammo savatda emas, uning qanday ishlatilayotganida. Isrof qilayotganlarga nasihat qilinadi. Ammo savat yasab ijaraga berish, o‘zida harom ish emas – halol tirikchilik bo‘lishi mumkin.

Vallohu a‘lam.