Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Aslida bunday narsani bilib iste’mol qilish kerak. Kolbasa degani ichiga ko‘p narsalar aralashtiriladigan mahsulot. Ustiga “halol” deb yozilishi yoki muhr bosilishi bilan halol bo‘lib qolmaydi. Muhimi – mahsulotning qanday tayyorlanayotgani va kim tomonidan ishlab chiqarilayotganini bilishdir.

Agar mahsulotni ishlab chiqarayotganlar orasida taqvoli, namozxon, salohiyatli odamlar bo‘lsa va ular xalq orasida rostgo‘yligi bilan tanilgan bo‘lsa, ularning gapiga ishonish mumkin. Chunki musulmon odam halol deb chiqarayotgan bo‘lsa, biz unga ishonamiz. Musulmonning so‘ziga ishonmasak, qassobdan ham, mezbondan ham shubhalanishga to‘g‘ri keladi. Bu esa odamlar orasida keraksiz gumon va haraj keltirib chiqaradi.

Shuning uchun, agar zohirida halollik belgisi ko‘rinib tursa, ishlab chiqaruvchilari taqvoli va rostgo‘y musulmonlar bo‘lsa, iste’mol qilish joiz bo‘ladi. Ammo agar mahsulotni ishlab chiqaruvchilar faqat pulni o‘ylaydigan, nimani bo‘lsa ham qo‘shaveradigan, ishonchsiz odamlar bo‘lsa, bunday mahsulotlardan tiyilgan afzal.

Vallohu a’lam.