Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Avvalo, farzand berish ham, uning sog‘lom yoki nosog‘lom bo‘lishi ham Alloh taoloning irodasi bilan bo‘ladi. Qon yaqinligi sabab bo‘ladi, degan gapni shifokorlar aytishadi. To‘g‘ri, ayrim hollarda yaqin qarindoshlardan bo‘lgan nikohda ba’zi kasalliklar kuzatilishi mumkin. Ammo bu doimiy qoida emas. Chunki ko‘plab qarindoshlar o‘zaro uylangan, lekin farzandlari sog‘lom bo‘lgan. Rasululloh ﷺ ham qizlari Fotimani amakivachchalari Ali roziyallohu anhuga berganlar. Sahobalar orasida ham bunday misollar ko‘p.

Demak, o‘z-o‘zidan “qarindoshga uylanish – farzand nosog‘lom tug‘iladi” degan qat’iy hukm yo‘q. Ammo agar ishonchli mutaxassis shifokor ma’lum oilada genetik muammo borligini aniqlasa, bunga jiddiy e’tibor berish kerak. Bu holda ajrashib, boshqa oila qurish shar’an joiz bo‘ladi, chunki bu sababni inobatga olish mumkin. Oila qurishdagi asosiy maqsadlardan biri – zurriyot qoldirish, sog‘lom farzand tarbiyalashdir.

Biroq shuni unutmangki, nogiron farzand Allohning sizlarga sinovi va ayni paytda rahmatidir. Bu siz uchun qiyomatda katta ajr va mag‘firat sababchisi bo‘ladi. Hadislarda aytilganidek, Alloh taolo mo‘min bandasini sinov bilan ulug‘laydi va bu uning gunohlariga kafforat bo‘ladi. Balki bu hol sizlar uchun dunyo va oxiratda foyda bo‘lar.

Zuluk bilan davolash masalasiga kelsak: shariatda davolanish joiz. “Alloh dardni berganidek, dardining davosini ham bergan” deyiladi. Zuluk ham ayrim kasalliklarda foydali bo‘lishi mumkin, ammo bu hamisha emas. Har narsaga zuluk yoki hijoma qilaverish to‘g‘ri emas. Mutaxassis, ishonchli tabibdan maslahat olib, zarar va foydasi aniqlangandan keyin qilinadi.

Shunday ekan, bu masalada shifokorlarning ilmiy maslahatini inobatga olib qaror qiling. Eng muhimi, sabr qiling, duoda bo‘ling. Nogiron farzand – Allohning sizlarga sinovi, balki oxiratda eng katta ne’mat bo‘lib chiqadi. Alloh sizlarga chiroyli sabr, yaxshi qaror va halol rizq ato qilsin.

Vallāhu a‘lam.