Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Modomiki siz sherigingiz bilan kelishib, o‘rtada tijorat ishini boshlagan bo‘lsangiz, u puldan ruxsatsiz olish mumkin emas.

Ya’ni, bu ishda sherigingizning haqi bor. Bu pul sizning qo‘lingizda turgani bilan, u yolg‘iz sizga tegishli emas. Undan sherigingizning roziligi bo‘lmasdan foydalanish, unga zulm qilish hisoblanadi. Shuning uchun “bildirmay olib turaman” deyishingiz noto‘g‘ri va harom ish bo‘ladi. Bunday qilmaslik kerak.

Boshqa yo‘llardan harakat qilib, o‘sha zarur mablag‘ni topishga urining. Masalan, oylik daromadingizdan tejash, boshqa qo‘shimcha ish qilish  bilan ehtiyojingizni yopishga harakat qiling

Yoki eng to‘g‘ri yo‘l: sherigingizdan ochiqcha ruxsat so‘rang. Ularga holatingizni tushuntiring: “Shu ming dollar kerak, hozircha o‘rtadagi puldan olib tursam, keyinchalik har oy foydamdan bo‘lib to‘lab beraman,” deb ayting. Agar sherigingiz rozilik bersa, unda olish mumkin. Agar ruxsat bermasa, olish harom bo‘ladi.

Lekin bildirmasdan olishingiz umuman mumkin emas, bu xiyonat bo‘ladi va qiyomatda og‘ir javobgarlikka sabab bo‘ladi.

Vallāhu a‘lam.