Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu masala har bir ayolning sog‘lig‘i va holatiga qarab farq qiladi. Ba’zilar uchun uch marta operatsiya og‘ir bo‘lsa, boshqalar yetti martagacha ham sog‘-salomat bo‘lib o‘tgan hollar bo‘lgan. Demak, bu holat har bir insonning jismoniy holatiga, toqati va salomatligiga bog‘liq.

Shuning uchun bu kabi masalalarda mutaxassis (shifokor) fikri asos bo‘lishi kerak. Agar shifokorlar sizning salomatligingizni hisobga olib:

“Keyingi homiladorlik jiddiy xavf tug‘diradi”,
desalar, unda bu holat zarurat bo‘ladi va shariat bunday zaruratda haraj (qiyinchilik)ni ko‘tarishni talab qilmaydi.

Alloh taolo Qur’onda shunday deydi:
“O‘zlaringizni halokatga tashlamang.”
(Baqara, 195)

Ya’ni, sog‘lig‘ingiz, hayotingiz jiddiy xavf ostida bo‘lsa, bu holatda oldini olish uchun tibbiy choralar ko‘rilishi joiz bo‘ladi.

Agar ayol to‘rtinchi yoki beshinchi farzanddan keyin jiddiy sog‘liq muammosi bo‘lishi mumkin bo‘lsa — bu holatda farzand yo‘lini to‘sish vaqtinchalik yoki doimiy tarzda shariatga zid emas, lekin shifokor tavsiyasi va holatga qarab bo‘lishi kerak.

Erlar bu masalada hushyor bo‘lishlari, ayolining sog‘lig‘ini qadrlashlari lozim. “Balki yana tug‘” deyish bilan ish bitmaydi. Bu borada mas’uliyat, rahm-shafqat va aql bilan ish ko‘rish kerak.

Xulosa:

• Agar shifokorlar keyingi homiladorlikni sog‘liqqa xavfli desa — yo‘lni to‘sish joiz.

• Agar shifokorlar hech qanday xavf yo‘q, hali imkon bor desa — unda sabrlik bilan davom ettirish afzal.

• Har holda, bu masala ijtihodiy bo‘lib, shaxsiy holatga qarab hukm chiqariladi.

Vallāhu a‘lam.