Bismillahir rohmanir rohiym. Alhamdulillah, vassalatu vassalamu ‘ala Rasulillah, amma ba’d.

Albatta, adolatli bo‘lish har bir insonning, xususan, eringizning ham, qaynonangizning ham vazifasidir.

Qaynonangiz, masalan, sizga salom aytib, kundoshingizga salom aytmasligi — bu u kishining shaxsiy xohishi. Kimga salom aytish, kimni so‘rash — bu har bir insonning qalbidagi muhabbat va munosabatga bog‘liq. “Nega unga salom aytmadingiz, aytsangiz hammaga ayting, aytmasangiz umuman aytmang”, deb aytish to‘g‘ri emas. Inson ko‘ngli tortgan kishisidan hol-ahvol so‘raydi, salom aytadi.

Sizga o‘zi yaxshi ko‘rib kelin qilgan bo‘lsalar, bu o‘ziga xos bir hurmatdir. Chunki bizning urf-odatlarimizda ko‘pincha qaynonalar ikkinchi xotinlarni to‘liq qabul qilmaydi. Ko‘pincha ularga nisbatan “o‘g‘limning pulini yeyapti”, “o‘g‘limni tortib oldi” degan singari noto‘g‘ri qarashlar bo‘ladi. Bu tushunmaslikdan kelib chiqadi. Siz bunga e’tibor bermang.

Salom aytdimi, aytmadimi — bunga chuqur kirib, ko‘nglingizni og‘ritmang. Boshqa tomondan qaraydigan bo‘lsak, qaynonangiz sizga salom aytadi, yaxshi ko‘radi — bu siz uchun bir ne’mat.

Eringiz esa adolatli bo‘lishga harakat qilyapti. Siz ham kundoshingizni musulmon opa deb ko‘ring. Eringiz u kishining ko‘ngli sinmasligi uchun bunday yo‘l tutayotgandir. Bu holat sizlar uchun Alloh taoloning bir barakasi, oilangizdagi yaxshilikdir aslida.

Shuning uchun bunaqa narsalarga chuqur berilib, o‘zingizni xafa qilish o‘rniga, salohiyatingizni oxiratga foyda beradigan amallarga sarflaganingiz afzal bo‘ladi.

Vallohu a’lam.