Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bunday masalani murosa bilan hal qilishga harakat qiling. Vaziyatni haddan ortiq keskinlashtirishga hojat yo‘q.

Avvalo, imkon qadar taqvo bilan ish tuting. Eringizning ukasi kelganida ham, ehtiyot choralarini ko‘rib, hurmatni saqlagan holda yashash yo‘lini izlang. Hayotda ba’zida shunday holatlar bo‘ladi: men uchta oilaning bitta uyda sabr bilan yashaganini ko‘rganman.

Doimo har kimga alohida uy bo‘lavermaydi. U Rossiyada ishlayotgan bo‘lsa, balki vaqtincha yashab, yana ketib qoladi. Shunday bo‘lsa, bu holatni muvaqqat (vaqtinchalik) qiyinchilik deb ko‘ring.

Shuningdek, eringiz ham o‘z ukasining holatiga rahm qilgan bo‘lishi mumkin. Inson bo‘lib, imkoniyatimiz borida yordam berish ham bir savob ishdir. Shuning uchun, er-xotin orasidagi mehrni saqlab, uyda tinchlikni saqlashga harakat qiling.

Lekin Allohning chegaralarini poymol qilmaslik kerak. Mahram va nomahramlik masalalarida albatta ehtiyot bo‘ling, bu yerda keskin chiziq bor. Qolgan masalalarda sabrli bo‘lishingiz — Alloh oldidagi taqvoyingizning belgisidir.

Shunday ekan:

• Taqvo bilan harakat qiling.

• Eringizni xursand qilishga harakat qiling.

• Ehtiyot choralarini ko‘rib, bu holatni vaqtinchalik qiyinchilik sifatida qabul qiling.

• Lekin dinimizning cheklovlari — nomahramlik chegarasini hech qachon buzmaslik kerak.

Vallāhu a‘lam.