Ha, gunohkor bo‘lasiz. Chunki onangiz sizga haqqingizni ado qilmagan bo‘lsa ham, bu sizning onangiz haqqini ado qilmasligingizga uzr bo‘la olmaydi. Onangiz sizning haqqingizni bermagan bo‘lsa, Alloh taolo huzurida javobgar bo‘ladi. Ammo bu sizni ham gunohga boshlashga asos bo‘lmaydi.

Har bir inson o‘z qabrida alohida yotadi va har kim o‘z amallaridan javob beradi. Sizning mas’uliyatingiz — o‘z burchingizni ado etish. Onangiz sizga qilgan zulm va haqsizliklar, sizning unga hurmat va xizmat ko‘rsatmaslik uchun bahona bo‘la olmaydi. Ona baribir onadir, shuning uchun unga yaxshi muomala qilish, yomon gapirmaslik va hurmatini saqlash farzdir.

Esingizdan chiqaring o‘tgan gina-kuduratlarni. Agar onangiz xato qilgan bo‘lsa, Allohdan uni kechirishini so‘rang va uning haqqiga duo qiling. Buyog‘iga esa unga yaxshilik bilan muomala qiling. Alloh taolo Qur’onda marhamat qiladi:

“Bir qavmga nisbatan bo‘lgan adovatingiz sizlarni adolatsizlikka undamasin.”

Yana bir oyatda shunday deydi:

“Ey mo‘minlar! O‘zlaringizni to‘g‘rilanglar. Agar sizlar hidoyatda bo‘lsalaringiz, adashgan kishilarning adashganligi sizlarga zarar qilmaydi.”

Demak, siz o‘zingiz hidoyatda bo‘lsangiz, onangizning xatolari sizga zarar qilmaydi. Va uning xatosi sizga ham xato qilish uchun yo‘l ochmaydi.

Shariat ruxsat bermaydi: “Odam gunoh qildimi, sen ham gunoh qil”, degan gap yo‘q. Agar onangiz gunoh qilgan bo‘lsa, bu faqat uning gunohidir. Siz esa o‘z burchingizni ado etishingiz shart.

Endi, onangiz o‘z burchini bajarmagan ekan — bu o‘tgan ish. Allohdan unga mag‘firat tilang. Ammo siz ham o‘z burchingizni bajarmasangiz, onangiz qilgan xatoni takrorlagan bo‘lasiz va gunohkor bo‘lasiz. Bu narsa davom etaveradimi? Keyin farzandlaringiz ham sizga shunday muomala qiladimi?

Har kim o‘z amali uchun javobgardir. Qabrda ham o‘zingiz yotasiz, sizning amallaringiz so‘raladi. Shuning uchun, mana shu kun uchun tayyorgarlik ko‘ring.

Vallohu a’lam.