Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu masalada eng go‘zal namuna Rasululloh ﷺdir. O‘zingizga shunday deb ko‘ring: “Agar hozir mening o‘rnimda Rasululloh bo‘lganlarida nima qilardilar?” Shu savolga ichki halolingiz bilan javob bering — muammo yechiladi, in shaa Alloh.

Anas ibn Molik roziyallohu anhu aytadilar:

“Men Rasulullohga o‘n yil xizmat qildim. Hech qachon qilgan ishimga: ‘Nega bunday qilding?’ demadilar. Qilmay qo‘ygan ishimga ham: ‘Nega qilmading?’ demadilar.”

Yana Anas roziyallohu anhu aytadilar:

“Uy ahli meni biror ishga yuborib, kechikib ketsam, Rasululloh: ‘Qo‘yinglar, taqdirda bo‘lsa, bo‘lardi’, der edilar.”

Bir safar Rasululloh ﷺ Anasga bir ish buyurdilar. U yosh bola sifatida: “Bormayman!” deb aytdi (aslida esa borish niyatida edi). Yo‘lda bolalar bilan o‘ynab ketib, topshiriqni unutib qo‘ydi.
Ortidan Rasululloh kelib, mehr bilan yelkasidan ushlab dedilar:

“Ey bola, men aytgan joyga bordingmi?”
Qarasam Rasululloh kulib turibdilar, deb hikoya qiladi Anas. U shunday hijolat bo‘ldiki, shu voqeadan so‘ng Rasulullohga hech qachon osiy bo‘lmadi.

Bu o‘n yil davom etgan xizmatda shunday muomala bo‘lgan.

Demak, siz rahbar sifatida Rasulullohning uslubiga yaqinlashishga harakat qiling. Ha, xodimlardan kamchilik chiqadi, bu tabiiy. Ammo siz sabrli, yumshoq, hikmat bilan yondashishga intilsangiz, har bir harakatingiz uchun ajr olasiz. Chunki Alloh taolo aytadi:

لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ
«Darhaqiqat, Rasulullohda sizlar uchun go‘zal (ibratli) namuna bordir.»
— Ahzob surasi, 21-oyat

Shuning uchun har bir holatda Rasulullohga o‘xshashga harakat qiling. Bu sizga dunyoda baraka, oxiratda esa ajr olib keladi. Alloh rozi bo‘lsin.

Vallāhu a‘lam.