Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Yo‘q, o‘gay qaynota bilan kelin orasida mahramlik bo‘lmaydi. Shuning uchun bu ikki kishi nomahram hisoblanadi.

Nomahram bo‘lganidan keyin, shariatda belgilangan chegaralarga amal qilish lozim:

• Zinat joylarini (qo‘l, yuz, bo‘yin kabi) ko‘rsatishi mumkin emas.

• Hijobda bo‘lishi shart.

• U bilan yolg‘iz qolishi, birga ovqatlanishi, erkin muloqotda bo‘lishi joiz emas.

To‘g‘ri, “qaynota” degan nomi bor, lekin bu nom shariatdagi mahramlikni anglatmaydi. Shariatda harom — harom, halol — halol. Hurmat boshqa, shariat hukmi boshqa. Kelin hurmat ko‘rsatsa ham, bu shariat doirasida bo‘lishi kerak.

Kelinning “adajon” deb murojaat qilishi, xizmat qilishi, bir xona yoki dasturxonda bemalol o‘tirishi — shariatga zid. Chunki bu, oxir-oqibat, nomahramlik chegarasini buzishga olib kelishi mumkin.

O‘zbek urf-odatida bunday hurmat tushunchasi chuqur o‘rnashgan. Ammo shariatni urfga bo‘ysundirish mumkin emas. Urf shariatga muvofiq bo‘lsa — yaxshi, lekin zid kelsa — shariat ustun turadi.

Shuning uchun, bu masalada kelin ham, qaynota ham ehtiyotkor bo‘lishi kerak. Har ikkisi o‘z o‘rnini, chegarasini bilib, nomahramlik hukmiga binoan muomala qilishi lozim.

Bu ish qiyin bo‘lishi mumkin, ayniqsa qarindoshlar noto‘g‘ri tushunsa. Lekin sabr bilan, hikmat bilan tushuntirish va shariatga taslim bo‘lish zarur.

Xulosa:
O‘gay qaynota va kelin nomahram hisoblanadi. Ular o‘rtasida shariatda belgilangan hijob, hilvat va muomala qoidalariga qat’iy amal qilinishi shart.

Vallāhu a‘lam.