Endi qarang, bu savolga aslida o‘zingiz javob berishingiz kerak bo‘lgan masala. Rasululloh sollallohu alayhi vasallam aytganlar: “O‘zinga foydali bo‘lgan narsaga haris bo‘lgin, Allohdan madad so‘ragin, ojiz bo‘lib o‘tirma”.

Hozir sizning oldingizda ikkita yo‘l turibdi: biri — ilm olish, ikkinchisi — hojiboshilik qilish. Agar ilm olishga imkoniyatingiz bo‘lsa, ya’ni ta’minotingiz bo‘lsa, men shubhasiz ilmni tavsiya qilaman. Chunki yoshlikda ilm olish eng maqbul paytdir.

Hojiboshilik bu dunyo ishidir, u hech qachon tugamaydi. Bugun million topasiz, ertaga ikki million, so‘ng uch million qilib, yana birovga berib ketasiz. Oxiri yana nol nuqtaga qaytasiz. Bu yo‘l ko‘pincha odamlarning g‘azabiga, nolishiga sabab bo‘ladi. Qozi insof bilan ish qilsa ham, odamlar uni yomon ko‘rishi mumkin, deyiladi-ku — hojiboshilar ham shunday. Agar adolat bilan ish qilsa ham, baribir kimdir uni la’natlaydi. Birovning haqini yeb qo‘ysa, duolar unga qarshi qilinadi.

Agar niyatingiz halol bo‘lib, faqat pul topish emas, balki bu yo‘l orqali ilm olishga, hayotingizni yo‘lga qo‘yishga yordam bo‘lsin degan bo‘lsangiz, bu — kasb, halol mehnat bo‘ladi. Bir akamiz aytib bergan edilar: “Bir qumarboz tog‘am bor edi, u aytardi: ‘Bir o‘xshab qolsa, bu ham hunar!’” — deyishgan. Bu, albatta, hazil, lekin shunday demoqchimanki, har bir mehnatni halollik bilan qilinsa, hunar hisoblanadi.

Agar tirikchilikka ehtiyojingiz bo‘lmasa, menimcha, hozircha ilm o‘qishingizni maslahat beraman. Chunki ilm o‘rganishdan afzalroq ish yo‘q. Vallohu a’lam.