Bismillah,
Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.
Avvalo, Alloh siz va qizingizga baraka bersin. Taqvo, hijob, ilmga muhabbat — bular Allohning katta ne’matlari. Sizlar qanday mashaqqatda ekaningizni tushunamiz. Bunday paytda eng muhimi — Allohga bog‘lanish va sabrli bo‘lish.
Agar qizingiz niqobsiz chiqmaslikni qat’iy niyat qilgan bo‘lsa, unga o‘ziga zarar yetmaslik, ota-onasiga tahdid bo‘lmaslik uchun hozirgi holatda uydan chiqmaslikni maslahat beramiz. Chunki ba’zan kichik zararni ko‘tarib, kattasidan saqlanish hikmat bo‘ladi.
Qizingiz uyda o‘tirib ham ilm o‘rganishi, hatto Qur’on yodlashi mumkin. Hozir internet orqali ilm olish imkoniyati juda keng: darslar, shayxlar, hatto sanad bilan Qur’on topshirish ham onlayn amalga oshirilmoqda. Siz ustozlarga bog‘lab bersangiz, u joyidan turmasdan qoriya bo‘lishi mumkin.
19 yosh — yosh. Oʻzbek urfida goʻyoki bu yosh kechikkan kabi ko‘riladi, ammo aslida bu yoshda hali koʻp eshiklar ochilishi mumkin. “Erga tegmay qolaman” degan vahima bilan noto‘g‘ri qadam tashlash kerak emas. Alloh uchun sabr qilganlarga Alloh o‘zi eshik ochadi. Bu vaqtni ilmga, Qur’onga, ma’naviyatga bag‘ishlash — eng to‘g‘ri yo‘l.
Qizlarni eshikdan chiqarmasdan, uyda Qur’on yodlatib katta qilgan salafi solih ayollar bo‘lgan. Hatto guvohlikka chaqirilsa ham, ularning oldiga qozi kelib, eshitib qaytgan. Shu darajada iffatli va parhezkor bo‘lishgan.
Qizingiz hozirgi holatda sabr bilan Qur’on yodlasa, kelajakda nafaqat o‘zi uchun, balki farzandlari va ummat uchun ham foydali bo‘ladi. Toki Alloh taolo sizga ilmlik, solih bir yigitni yo‘liqtirguncha. Allohning va’dasi haqiqat:
وَمَن يَتَّقِ ٱللَّهَ يَجْعَل لَّهُۥ مَخْرَجًۭا
Kim Allohga taqvo qilsa, uning yo`lini ochib qo`yadir.
وَيَرْزُقْهُ مِنْ حَيْثُ لَا يَحْتَسِبُ ۚ وَمَن يَتَوَكَّلْ عَلَى ٱللَّهِ فَهُوَ حَسْبُهُۥٓ ۚ إِنَّ ٱللَّهَ بَـٰلِغُ أَمْرِهِۦ ۚ قَدْ جَعَلَ ٱللَّهُ لِكُلِّ شَىْءٍۢ قَدْرًۭا ٣
Va unga o`zi o`ylamagan tarafdan rizq berur. Kim Allohga tavakkal qilsa, bas, unga U zotning O`zi kifoyadir. Albatta, Alloh O`z ishini yetkazuvchidir. Haqiqatan, Alloh har bir narsaga o`lchov qilib qo`ygandir.
(Talaq: 2-3)
Shuning uchun sizga maslahatimiz:
-
Qizingiz internet orqali Qur’on va boshqa ilmlarni o‘rgansin.
-
Har kuni ustozga murojaat qilib dars topshirib borsin.
-
Telefon, ijtimoiy tarmoqlardan tiyilsin.
-
Yil ichida Qur’onni yodlab, qoriya bo‘lsin.
Shu orqali qalbida yorug‘lik, vaqtda baraka paydo bo‘ladi. Bu holat, bu cheklov — Allohning yomonligi emas, yaxshilik tomon yetaklaydigan sinovidir. Yaxshi niyatda sabr qiling. Iloji bo‘lsa ustozlardan sanadli ta’lim olib, ilm ahliga aylansin.
InshaAlloh, bir kun kelib, bu taqvo va sabr sizlar uchun eng katta baxt eshigini ochadi. Shuning uchun hozirgi paytdan imkon qadar foydalansin. Qur’on, ilm — eng barakali yo‘ldir.
Alloh taolo sabr, iymon, mustahkam niyatlar bilan sizga bu dunyoda ham, oxiratda ham eng yaxshi yo‘llarni ochsin. Amin.
