Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Farzand ko‘rish masalasi — er-xotinning ikkalasi uchun ham huquqdir.

Agar er:
“Tug‘asan” desa — siz majbur emassiz, ayniqsa tug‘ruqlar har safar operatsiya bilan bo‘lgan bo‘lsa. Bu holda sizning o‘zingizni himoya qilishga, sog‘lig‘ingizni e’tiborga olishga haqqingiz bor.

Agar eringiz yana farzand xohlasa, shariat unga boshqa ayolga uylanish yo‘lini ham ochib qo‘ygan.
Siz aytishingiz mumkin:

“Men sog‘lig‘im sababli yana tug‘olmayman, agar sizga farzand kerak bo‘lsa, boshqa ayolga uylanishingiz mumkin.”

Bu — joiz, shariatda mavjud bo‘lgan halol yo‘l.

Agar eringiz shuni eshitib, baribir sizdan farzand xohlasa, siz ham xohlasangiz va shifokorlar ruxsat bersa — tug‘ishingiz mumkin. Bu o‘zaro kelishuv bilan bo‘ladi.

Lekin ikki farzandni ham operatsiya bilan tug‘gan ayolga:
“Yana tug‘” deb majburlash qiyin.
Bu — sog‘liq, xavf va dard masalasi. Shariat bunga majburlamaydi.

Shu bilan birga shuni bilingki:

Shariatning umumiy maqsadlaridan biri — ummatning ko‘payishi. Agar sog‘lig‘ingiz yetsa, tug‘ish fazilatli. Farzand qancha ko‘p bo‘lsa:

• duogo‘ylar ko‘payadi,

• uyga baraka ko‘payadi,

• ota-ona uchun savoblar ko‘payadi.

Lekin hammasi — sizning real sog‘lig‘ingizdan kelib chiqadi. Hayotingizga xavf bo‘lsa, tug‘ishni tark etishingiz — gunoh emas.

Vallohu a‘lam.