Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Agar taomning o‘zi halol bo‘lsa — masalan, non, go‘sht, sabzavot yoki boshqa halol mahsulotlardan tayyorlangan bo‘lsa — uni yeyish joiz. Chunki bu taom aynan harom pulga sotib olingani aniq emas, ehtimol halol daromaddan olingandir degan husnuz-zan (yaxshi gumon) bilan yeyish mumkin.

Shariatda modomiki mahsulotning o‘zi halol bo‘lsa, u qanday pulga olingani aniq bilinmasa, uni yeyish joiz hisoblanadi. Yaxshi niyat bilan, gumon ustida harom deb hisoblamasdan yeyish mumkin. Vallāhu a‘lam.

Lekin agar odam: “Men bunday oilaning taomidan yemayman, chunki sizlar haromdan topasizlar”, — deb yemasa, va ularga nahy ‘anil munkar (yomonlikdan qaytarish) sifatida ta’sir qiladigan bo‘lsa, — bunday taomni yemay turish afzal bo‘ladi.

Ammo yemay qo‘yish natijasida o‘ziga yoki boshqalarga katta zarar yetadigan bo‘lsa — masalan, oila buzilishi, janjal chiqishi, g‘azab, urush paydo bo‘lishi — bu holda yeyish kerak bo‘ladi. Shuning uchun bunday holatlarda maslahat bilan, hikmat bilan yondashish lozim.

Umuman olganda, halol va harom aralash daromadli oilaning taomidan yeyish joiz, agar mahsulot o‘zi halol bo‘lsa va u harom pulga sotib olingani qat’iy ma’lum bo‘lmasa. Ammo taqvo va ehtiyot yuzasidan yemayman, desa — bu ham go‘zal ish, biroq majburiy emas.

Vallāhu a‘lam.