Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu holat Alloh taoloning irodasi bilan bo‘ladi. Kimga nima berishni — rizqni, farzandni — Alloh o‘zi biladi. Farzand ham rizq hisoblanadi. Shuning uchun mo‘min kishi Allohning taqdiriga rozi bo‘lishi, sabr bilan qabul qilishi kerak. Iymonning shartlaridan biri — qadar (taqdir)ga, yaxshisi-yomoniga iymon keltirishdir.

Farzand bo‘lmasa, bu Allohning jazosi yoki balosi emas. Aksincha, Alloh boshqa ne’matlar orqali uni himoya qilayotgan bo‘lishi mumkin. Ba’zida farzand berilmagan odamga ilm, salomatlik, bo‘sh vaqt, Allohga yaqinlik kabi boshqa ne’matlar berilgan bo‘ladi. Hatto farzandli bo‘lganida, baxtsiz yoki imonsiz bo‘lishi mumkin edi. Alloh har narsani hikmat bilan qiladi.

Alloh bir ne’matni bermasa, boshqasini beradi. Mo‘min kishi shukr va sabr ila yashaydi. Ibrohim (a.s.) va Sora onamiz uzoq yillar farzandsiz yashashgan, qari bo‘lganlarida Alloh ularga farzand ato qilgan. Bu Allohning rahmatidan hech qachon umid uzmaslik kerakligini ko‘rsatadi.

Agar farzand berilmagan bo‘lsa, bu — Allohning hikmatidir. Bu holatni qabul qilish, Allohning bergan boshqa ne’matlarini sanab, shukr qilish kerak. Ko‘z, yurak, sog‘liq, iymon, salomatlik, ibodat imkoniyati — bularning barchasi ulkan ne’matdir.

Shuning uchun sabrli bo‘ling, umid bilan duo qiling va Allohdan rozi bo‘ling. Unutmang: Allohning har bir qilgani adolatli va hikmatlidir.

Vallohu a‘lam.