Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Albatta, inson Rasululloh ﷺ aytganlaridek, ba’zan g‘amga botadi. Farzandi yo‘q odam farzandli kishilar oldida o‘zini noqulay his qilishi tabiiy. Bu har bir inson boshidan kechirishi mumkin bo‘lgan holatdir. Kambag‘al odam boylar oldida o‘zini ojiz his qilgani kabi, farzandsiz kishi ham farzandli kishilarni ko‘rib ranjishi mumkin.

Bunday holatga eng yaxshi yechim — taqdirga iymon keltirish va Allohning berganiga rozi bo‘lishdir. Biz: “Robbim Alloh, Payg‘ambarim Muhammad, dinim Islom,” — deb rozi bo‘lgan bo‘lsak, Alloh taoloning har bir taqsimotiga ham rozi bo‘lishimiz kerak. Farzand — rizq. Alloh kimga xohlasa beradi, kimga xohlasa bermaydi. Kimdir farzanddan mahrum bo‘lsa ham, boshqa jihatdan katta ne’matlarni olgan bo‘lishi mumkin.

Ba’zida inson o‘zida bor ne’matni ko‘rmaydi, boshqalarda bor narsaga havas qiladi. Holbuki, farzandsizlik orasida xotirjamlik, rohat va boshqa ko‘plab ne’matlar ham yashiringan bo‘lishi mumkin.

Imom Buxoriy rahimahullohni olaylik — ul zotning farzandi bo‘lmagan. Ammo u zot bizga dunyo va oxirat uchun eng bebaho merosni — Sahih Buxoriyni qoldirgan. Bu meros har bir musulmon uyida o‘qiladi, o‘rganiladi, duolar unga yetib boradi. Bu qanday ulug‘ ajr va savob!

Farzand — yagona meros emas. Ilm, solih amal, yaxshi iz qoldirish — bular ham Allohga yaqin bo‘lishda katta vositalardir.

Shu bilan birga, umidni uzmaslik kerak. Allohning fazli keng. Zakariyo (alayhis-salom) keksayganlarida duo qilib farzand so‘radilar va Alloh ularga Yahyo (alayhis-salom)ni berdi. Ibrohim (alayhis-salom) ham keksalik chog‘ida farzandli bo‘ldilar. Alloh xohlasa, har qanday holatda rizq berishga qodirdir.

Shuning uchun farzandsiz er-xotinlar quyidagilarni yodda tutsin:

• Alloh bergan holatga rozi bo‘ling.

• Shukr qilishda davom eting.

• Duoni tark etmang — duo mo‘minning qurolidir.

• Farzandga yetaklaydigan sabablarni harakat bilan qiling, lekin Allohga tavakkul qiling.

• Ilm, solih amal, saxovat bilan meros qoldiring — bu ham farzand kabi ajr olib keladi.

Bilingki, sizdan ham yomon ahvolda bo‘lganlar bor: og‘ir dardga chalinganlar, yurishga majburlar, bolalarining g‘amidan tinkasi quriganlar… Alloh sizga farzand bermagan bo‘lsa-da, tinchlik, sog‘lik, vaqt va salomatlik bergandir. Shukr qiling, sabr qiling, duo qiling.

Wallohu a‘lam.