Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Ha, bu holat haqiqatda zulm sanaladi. Yiliga atigi o‘n besh kun keladigan, kelganida ham sizga loqayd bo‘ladigan erning bu muomalasi to‘shak haqlari va mehr-muhabbat nuqtayi nazaridan zulmdir. Ammo bu holatga qarab sizga “qochib keting” degan fatvo berilmaydi.

Islomda nikoh qanday jiddiylik bilan tuzilgan bo‘lsa, uni hal qilish – ajrim (taloq) masalasi ham shunchalik muhim va shariatga muvofiq yo‘l bilan bo‘lishi lozim.

Shu sababli siz birinchidan, eringiz bilan ochiqchasiga suhbat qilib, masalani hal qilishga harakat qiling. Agar foyda bermasa:

• Otangiz, akangiz yoki yaqin qarindoshlaringiz bu ishga aralashsinlar.

• Qudalar bilan gaplashib, bir yo‘lga qo‘yishsin.

• Agar bu ham foyda bermasa, shar’iy ajrashish – ya’ni taloq yoki faskh nikoh (qozilik yo‘li bilan ajrim) masalasini ko‘tarishsin.

Qochib ketish – bu muammoni hal etmaydi, balki boshqa muammolarni keltirib chiqaradi. Alloh Qur’onda:

وَأْتُوا۟ ٱلْبُيُوتَ مِنْ أَبْوَٰبِهَا ۚ
“Uylar ichiga eshiklaridan kiringlar.” (Al-Baqara 189)
ya’ni har bir masalani halol va to‘g‘ri yo‘l bilan hal qilish kerak.

Shunday ekan, siz sabr va aql bilan yondoshing, ota-onangiz, akalaringiz orqali shar’iy tartibda bu masalani hal qiling. Agar erkak o‘z vazifasini bajarmayotgan bo‘lsa, u shunga javobgar bo‘ladi. Siz esa bu zulmda befarq bo‘lmay, shar’iy vositalar orqali yechim izlashingiz lozim.

Vallohu A‘lam.