Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Sizning holatingizni tushundim. Bu kabi vaziyatlarda eng afzal yo‘l — qadar (taqdir)ga ishongan holda Allohga suyanishdir. Agar Umraga borish sizga taqdir qilingan bo‘lsa, hech kim buni to‘sib qo‘ya olmaydi. Rizq va martabani bandalar emas, faqat Alloh beradi.

Yoshligimizda bir masal aytilardi: Tilanchi podshoh eshigida turib, har safar “Ber dedi – Rahmon, berdi Sulton”, der ekan. Bir kuni podshoh: “Bundan keyin bermanglar”, deb buyuradi. Tilanchi ketayotib: “Berma dedi – Rahmon,  Sulton qayerdan bersin?”, degan.

Demak, Alloh bermasa, hech kim bera olmaydi. Eringiz emas, sizning haqiqiy rizq beruvchingiz Allohdir. Qachonki rizqingiz sizga taqdir etilgan bo‘lsa, uni hech qanday e’tiroz yoki achchiqlanishsiz olasiz. Aks holda, harakat qilsangiz ham yetib kelmaydi.

Ba’zi salaflar aytgan:

“Rizqim bo‘lgan narsaning albatta menga kelishini bilganim uchun xotirjam bo‘ldim. Rizqim bo‘lmagan narsani esa harakat qilsam ham kelmasligini anglab, undan voz kechdim.”

Demak, siz taqdirga bo‘lgan to‘liq iymon bilan qalbingizni taskinlantiring. Bu og‘riq, xafalik — insoniy hol. Sahobalardan biri aytganidek: “Men ham inson bolasiman — odamlar afsuslansa, men ham afsuslanaman.”

Ammo dilingizni tinchlantiradigan narsa — Allohga suyanish, uni razzoq deb bilishdir. U kishi sizga yordam bermagan bo‘lishi mumkin, lekin ehtimol sizga aytmay ketganida ham sabablari bordir: sizni xafa qilishni istamagan yoki bilmasdan qilgan bo‘lishi mumkin.

Buni og‘irlik bilan emas, yengillik bilan qabul qiling. Balki o‘zi qachondir qilgan ishi uchun afsuslanar. Agar siz sabrli, muloyim va ko‘ngli keng ayol bo‘lib, sukut qilgan holda o‘z holatingizni Allohga topshirsangiz — Alloh albatta sizni ko‘taradi.

Shuningdek, bu vaqtni ziyon qilmay, ilm o‘rganishga, Qur’on yodlashga sarflang. Ba’zi ayollar turmush tashvishlaridan ilmga vaqt topolmaydi, sizda esa imkon bor. Alloh sizga bo‘sh vaqt va salomatlik bergan ekan, uni ilmgа bag‘ishlang.

Umraga borish niyatingizni saqlang. Balki hozir emasdir, lekin sabr bilan kuting — rizqingiz Allohning huzurida yozilgan. Shu orada Qur’on yodlang, dars tinglang, ko‘nglingizni ibodat bilan to‘ldiring. Alloh baraka bersin, sizga va farzandlaringizga.

Allāhumma āmin.