Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Farzand ko‘rish huquqi — er va xotinning o‘zaro mushtarak haqqi (teng huquqi). Bu faqat erning qaroriga bog‘liq emas. Agar er “farzand ko‘rmaymiz” desa, u xotinning haqqiga tajovuz qilgan bo‘ladi. Shuning uchun, shariatga ko‘ra, sizning farzand ko‘rishga haqqingiz bor va er rozi bo‘lmasa ham homilador bo‘lishingiz mumkin.

Agar er bu sabab bilan taloq bersa, bu ham zulmdir, chunki u xotinning haqqini tortib olgan bo‘ladi. Ko‘p hollarda bunday qarorlar erkakning jaholatidan, iqtisodiy qo‘rquvidan yoki kelajak tashvishlaridan kelib chiqadi. Ammo shariatda ummatning ko‘payishiga targ‘ib bor. Rasululloh ﷺ:

«Uylaninglar, ko‘payinglar! Chunki men qiyomat kuni ummatimning ko‘pligi bilan faxrlanaman» (Abu Dovud, an-Nasā’iy).

Farzand — ota-onaning amalining davomidir, umrdagi baraka vositasidir. Solih bo‘lsa, u ota-onaga shafоat qilishi mumkin. Hayotiy tajriba ham ko‘rsatadiki, ko‘p farzandli oilalarda bolalar bir-biriga suyanch bo‘lib, hayotlari mustahkamroq bo‘ladi.

Shuning uchun erning bu qarashi to‘g‘ri emas. Sizning esa farzand ko‘rishga to‘liq haqqingiz bor.

Vallohu a‘lam.