Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Alloh taolodan sizga solih, diniga xizmat qiladigan, ko‘nglingizdagi niyatlaringizdan ham yaxshiroq farzand ato etishini so‘raymiz. Xolid ismi – go‘zal ism. Xolid ibn Valid (r.a.) Allohning qilichi deb tan olingan, Islom tarixida katta zafarlarga erishgan buyuk sahobadir. Bunday ulug‘ zotning ismini qo‘yish – yaxshi niyat alomati.

Azon va iqomat masalasi: chaqaloqning qulog‘iga azon va iqomat aytish haqidagi hadis zaif, ammo bu amal ba’zi salafiy va hanafiy ulamolar tomonidan amalda qo‘llanilgan. Shuning uchun agar siz bu amalni qilgan ulamolarga ergashsangiz, bid’at qilgan bo‘lmaysiz, inshaAlloh. Ammo ihtiyotni ko‘zlab, roji‘ (afzalroq) qavl bo‘yicha tark qilmoqchi bo‘lsangiz ham, zarar yo‘q.

Qur’oniy suralarni o‘qib dam solish – Oyatul Kursiy, Ixlos, Falaq, Nos kabi suralarni o‘qib, chaqaloqqa ruqya qilish esa sahih va mustahab amaldir. Bu bilan siz bid’at qilgan bo‘lmaysiz. Bu – Rasululloh ﷺdan rivoyat qilingan ruqya amallariga muvofiqdir.

Nasihat:
Farzandga aqiqa qilish, yetti kunligida sochini oldirib, o‘sha miqdordagi kumushga teng sadaqa qilish mustahabdir. Eng muhimi – unga halol luqma yedirish va diniy tarbiyada ulg‘aytirishdir. Bu siz uchun eng katta sarmoya bo‘ladi.

Vallohu A‘lam.