Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bugungi savollarning ko‘pi bir-biriga o‘xshash: bu hayot imtihon. Har bir mo‘min inson hayotda sinaladi — ba’zida qarshilik, ba’zida to‘siqlar chiqadi. Yaxshi ish qilgan paytingizda, albatta, shayton vasvasa qiladi, odamlar esa to‘siq bo‘lishadi.

Rasululloh ﷺ Makkada namoz o‘qiyotganlarida ustlariga ahlat tashlashgan, da’vat qilganlarida qarshilik qilishgan, sahobalarini qiynashgan. Ammo Rasululloh ﷺ sabr bilan yo‘llarida davom etganlar. Bu biz uchun eng chiroyli namuna.

Shuning uchun sizlarga nasihatim: ma’siyatga sherik bo‘lmang, lekin yaxshilikni tark qilmang. Garchi buvingiz yomon gapirsa, nojo‘ya ishlar qilsa ham, siz odobdan chiqmasdan chiroyli muomala qiling. Ma’siyat ishlar bo‘lsa, muloyimlik bilan rad eting, lekin hurmatsizlik qilmang.

Alloh hidoyat beruvchi zot. Bugun sizga tavfiq bergan Zot, ertaga buvingizga ham berishi mumkin. Siz sabrli bo‘ling, da’vatni hikmat va halimlik bilan davom ettiring. Nuh عليه السلام 950 yil da’vat qildilar, ammo juda oz odam iymon keltirdi.

Shuning uchun, harakatdan to‘xtamang. Iloji boricha ularga yaxshi gapiring, duo qiling, foydali suhbatlar bilan band bo‘ling. Shunga qaramay ular hidoyat topmasa, bu Allohning hikmatidir. Abu Tolib Rasululloh ﷺ bilan 40 yildan ortiq yashab, iymon keltirmadi.

Ammo sabr qilgan, matonat ko‘rsatgan bandalarga Alloh taolo albatta ajr beradi. Siz shunchaki o‘z burchingizni ado eting.

Vallohu a’lam.