Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Avvalo, farzand — Allohning sovg‘asi. Uni berishi ham, bermasligi ham rahmatdir. Alloh kimga farzand bersa, rahmat qilib beradi. Kimga bermasa ham, boshqa eshikdan rahmatini ato etadi. Shuning uchun farzand bermagan bo‘lsa, bu Allohning hikmatidir.

Jannatda toj masalasi

Jannatdagi ne’matlar faqat toj kiyishdan iborat emas. Ba’zan farzandli bo‘lmagan inson sabr qilgani, Allohga doimiy duo qilgani, ilm o‘rganib, din yo‘lida xizmat qilgani tufayli, tojdan ham ulug‘roq ne’matlarga erishishi mumkin. Chunki farzandli ayol ko‘p hollarda band bo‘lib qoladi, ilm va xizmatga vaqt topa olmaydi. Farzanddan chalg‘imagan inson esa o‘zini ilmga, ibodatga va da’vatga bag‘ishlashi mumkin.

Qiyosiy misollar

• Kimdadir ko‘z yo‘q, bu katta ne’matdan mahrumlikdir, ammo uning evaziga ko‘p zikr, diqqat va taqvo eshiklari ochiladi.

• Kimdadir farzand nogiron tug‘iladi, bu ham imtihon, lekin shu imtihon orqali qalbi yumshaydi, Allohga bog‘lanadi.

• Kimdadir ko‘plab farzand bo‘ladi, lekin ular ota-onasiga qarshi chiqib, gunohga botishi mumkin. Bunda farzand ne’mati emas, musibatga aylanishi mumkin.

Shuning uchun Allohning rahmati qayerdaligini odamning o‘zi bilmaydi. Alloh bermagan narsasining o‘rniga boshqa narsani ato etgan bo‘ladi.

Bola asrab olish masalasi

• Bola asrab olishning o‘zi joiz. Ayniqsa, bolani abortdan saqlab qolish — savob ish. Chunki bir insonning hayoti saqlab qolinyapti.

• Lekin shariatda “tabanniy” — bolani o‘z farzandi deb da’vo qilish, nasabni o‘zgartirish man qilingan. Bola asl ota-onasining farzandi bo‘lib qoladi. Uni yashirish yoki “men seni tug‘dim” deyish — gunohdir.

• To‘g‘ri yo‘li: bolaning asl ota-onasi kimligi ma’lum bo‘lishi, siz esa unga yordamchi, homiy va mehribon tarbiyachi sifatida qarashingiz kerak.

Xulosa

• Farzandsizlik ham Allohning imtihoni va rahmatidir.

• Sabr qilish, ilm va ibodatga ko‘proq vaqt ajratish orqali tojdan ham ulug‘roq ne’matlarga erishish mumkin.

• Bola asrab olish — savob, lekin uni o‘z farzandi qilib olish emas, balki homiylik va tarbiya shaklida bo‘lishi kerak.

Vallāhu a‘lam.