Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Alloh o‘g‘lingizga solihlikni, sizga esa sabr va tavfiqni ato qilsin. Tahajjud — albatta ulug‘ ibodat. Ammo duo qilish faqat tahajjud bilan cheklanmaydi. Siz onasiz — onaning qalbdan chiqqan duosi eng kuchli duolardan biridir. Kunduzi ham, boshqa farz yoki nafl namozlardan keyin ham, yurib ketayotganda ham, uy ishlari orasida ham duo qilsangiz, Alloh taolo eshitadi.

Alloh hech qachon: “Faqat tahajjudda duo qilsang, javob beraman” demagan. Yana esdan chiqarmang: duo faqat bir kechada natija beravermaydi. Ba’zida Alloh sabringizni sinaydi, ba’zida duoni vaqtini kechiktiradi, lekin albatta javobsiz qoldirmaydi.

Shu bilan birga, sabablarga ham amal qiling: o‘g‘lingizga mehr bilan, lekin qat’iyat bilan eslatib turing. Yaxshi suhbatlar quring, iymon haqida hikoyalar ayting, solih do‘stlar bilan tanishtiring. E’tiborsiz qoldirmang, lekin urishib, itarib yubormang. Chunki bugungi ko‘ngildan ketgan gap, ertaga qalbda mevaga aylanishi mumkin.

Sabrli bo‘ling, Allohga suyaning. Alloh duolaringizni ijobat etsin. Farzandingizni solih bandalar safidan qilsin.

Amin.