Bismillahir rohmanir rohiym. Alhamdulillah, vassalatu vassalamu ‘ala Rasulillah, amma ba’d.

Bunday vaziyatda ayol sabr qilsin. Foyda va zararlarni solishtirish kerak. Ya’ni, hozirgi holatning zarari bormi? Bor. Lekin agar eridan chiqsa, ajrashsa, kelajakda bundan ham katta zarar kelishi mumkinmi? Qaysi zarar kattaroq? O‘sha kattaroq zarardan saqlanish uchun, kichikroq zarar bo‘lsa ham sabr qilish kerak.

Agar hozirda onasining uyida yashayotgan bo‘lsa va olti oydan beri er bilan aloqa uzilgan bo‘lsa, telefon ham qilmasa — shariatda ayolning haqlari bor: to‘shak huquqi bor, nafaqa huquqi bor. Er bu mas’uliyatni bajarmayapti. Unday bo‘lsa, bu ayol to‘rt oydan oshgach, shariat asosida murojaat qilishga haqli bo‘ladi.

Agar isloh qilishning iloji bo‘lmasa, va ayol: “biz bu holatni tuzata olmayapmiz”, desa, unda ikki yo‘l bor:

Er erlik qilsin, odamdek yashasin.

Yoki ayolga erkinlik, javobini bersin.

Bunday holatda orani isloh qiladigan odamlarga ehtiyoj bor. Hozir bu xotinga “shunday qil”, “bunday qil” deb maslahat berish juda og‘ir. Chunki “ko‘rpaning issig‘ini yotgan biladi”. Er bilan yashash foydalimi, ajrashish foydalimi — buni faqat o‘zi biladi. Eri qanday, uning xulqi qanday — o‘ziga ayon.

Shuning uchun bitta muhim maslahat:
Foyda va zararlarni solishtiring.
Zararlarni solishtiring, foydalarni solishtiring. Qayerda kattaroq foyda bor, qayerda kattaroq zarar bor? O‘sha asosda qaror qiling.

Vallohu a’lam.