Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Agar sog‘lig‘ingizda jiddiy muammo bo‘lmasa, ya’ni yurak, qon bosimi, yoki hayot uchun xavf soluvchi holatlar bo‘lmasa, trubalarni bog‘latish shar’an joiz emas. Bu — Allohning rizq va hayot haqidagi taqdiriga aralashish sanaladi. Farzandlar Allohning ne’mati bo‘lib, ularni oldindan cheklab qo‘yish o‘ta jiddiy ish.

Alloh taolo hech kimga toqatidan ortiq yuk yuklamaydi. Ba’zan odamlar yosh ulg‘aygach, tabiiy ravishda farzand ko‘rmay qo‘yadi — bu holatning o‘zi Alloh tomonidan bir to‘xtashdir.

Ammo agar shifokorlar aniq tibbiy sabablar bilan: “Keyingi tug‘ruq sizning hayotingiz uchun xavfli bo‘ladi” — deb, ishonchli tashxis qo‘yishgan bo‘lsa, bu holda trubalarni bog‘latish joiz bo‘ladi, chunki bu — zarurat asosida amalga oshiriladi.

Lekin oddiy charchoq, farzandlar soni yetarli bo‘ldi degan mulohazalar bilan bog‘latish joiz emas.

Xulosa:
Agar sog‘lig‘ingiz yaxshi bo‘lsa, bog‘latishdan saqlaning. Ammo hayotingizga xavf tug‘diruvchi tibbiy zarurat bo‘lsa, ruxsat etiladi.