Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Ha, bu joiz, muboh bo‘lgan ish hisoblanadi. Biroq har doimgidek, foyda va zararni solishtirib ko‘rish kerak. Ayollar tomonidan taksi xizmatini ko‘rsatishda ham ba’zi ehtiyot choralariga rioya qilish lozim, chunki bunda ham ayrim fitnalar bo‘lishi mumkin.

Agar bu xizmat faqat ayollarga xizmat ko‘rsatadigan bo‘lsa va haqiqiy ehtiyoj mavjud bo‘lsa — ayniqsa erkak taksichilar bilan bo‘ladigan nojo‘ya holatlar oldi olinayotgan bo‘lsa — bu holda bu ish shariatan joiz bo‘ladi, in shā Alloh.

Zamonaviy hayotda erkak taksichilar bilan yuzaga kelayotgan muammolar – noo‘rin gaplar, yomon nigohlar yoki boshqa fitnali holatlar – ko‘payib ketgani sir emas. Ayollar uchun maxsus va xavfsiz muhitda xizmat ko‘rsatish esa bu fitnalarning oldini olishda foydali bo‘ladi.

Shu bois, agar ayollar haydovchiligi ostida tashkil etiladigan bu xizmat fitnadan xoli, xavfsiz va ijtimoiy ehtiyojga mos bo‘lsa, u holda bu ish ma’qul va maqsadga muvofiq hisoblanadi.

Vallāhu a‘lam.