Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin

Agar sizning qo’lingizdagi mablag’ faqat 2000 AQSh dollari bo’lgan bo’lsa va boshqa zakot hisoblanadigan mol-mulkingiz bo’lmagan bo’lsa, bu mablag’ning o’zi zakot nisobiga yetmaydi. Shuning uchun undan zakot vojib bo’lmaydi.

Lekin agar sizning boshqa zakot hisoblanadigan mablag’laringiz ham bo’lgan bo’lsa, masalan, qo’lingizda yoki hisobingizda yana 10–15 ming dollar mablag’ingiz bo’lib, zargardagi 2000 dollar ham shu boylikning bir qismi hisoblangan bo’lsa, unda bu pulni ham umumiy mablag’ga qo’shib zakot hisoblanadi.

Shunday holatda, pul zargarda turgan yillar uchun zakot vojib bo’lgan bo’lsa, o’sha yillarning zakotini ado qilishingiz kerak bo’ladi.

Ammo pul zargar bankrot bo’lganidan keyin butunlay yo’qolgan bo’lsa, yo’qolgan vaqtdan boshlab u mablag’dan zakot vojib bo’lmaydi.

Xulosa qilib aytganda:

• Agar faqat 2000 dollar mablag’ingiz bo’lgan bo’lsa va u nisobga yetmagan bo’lsa, zakot vojib emas.
• Agar boshqa mablag’laringiz bilan qo’shilganda nisobga yetgan bo’lsa, pul yo’qolguniga qadar o’tgan yillar uchun zakot beriladi.
• Pul yo’qolganidan keyingi davr uchun esa zakot vojib bo’lmaydi.

Zakot vojib bo’lishi uchun mol-mulk nisobga yetgan bo’lishi va uning ustidan bir hijriy yil o’tgan bo’lishi shart.

Vallohu a’lam.