Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Yo‘q, Ali roziyallohu anhu Fotima onamiz hayotlik paytlarida boshqa ayolga uylanmaganlar. Lekin bir safar Abu Jahlning qiziga uylanish niyatida bo‘lganlar. Bu gap Rasululloh ﷺning qulog‘iga yetganida, minbarda chiqqan holda:

“Ali mening qizimning ustiga Allohning dushmanining qizini olmoqchi ekan. Rasulullohning qizi bilan Allohning dushmanining qizi bir nikoh ostida jamlanmaydi,”

— deb qat’iy rad etganlar. Shuningdek:

“Qizimni xafa qilgan kishi, meni xafa qilgan bo‘ladi,” — deb ogohlantirganlar.

Shundan so‘ng Ali roziyallohu anhu uylanish fikridan qaytganlar va Fotima onamiz hayotlik paytlarida boshqa ayolga uylanmaganlar. Fotima onamiz Rasululloh ﷺ vafotlaridan olti oy o‘tib dunyodan o‘tganlar. Shundan keyin Ali roziyallohu anhu boshqa ayollarga uylanganlar.

Ulamolar bu holatda boshqa ayolga uylanishning man qilinganini Fotima onamizning sharafiga emas, Rasululloh ﷺning maqomiga hurmat sababli bo‘lganini ta’kidlaydilar.

Vallāhu a‘lam.