Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu yerda masala — sunnatni to‘liq tushunmaslik bilan bog‘liq. Chunki sunnat namozlar ikki xil shaklda kelgan:

1. Ikki rakat o‘qib, salom berish, so‘ng yana ikki rakat o‘qish.

2. To‘rt rakatni bir o‘tirishda, bitta salom bilan o‘qish.

Ikkala shakl ham sunnatda kelgan.

Hadisda:

«صلاةُ الليلِ مثنى مثنى»

— “Tungi namoz ikki rakat, ikki rakatdir” degan rivoyat bor.
Ba’zi rivoyatlarda bunga kunduzgi namozlar ham qo‘shib zikr qilingan, ammo bu qo‘shimcha haqida ulamolarning ixtilofi bor, ba’zilari uni zaif degan.

Shu bilan birga, Rasululloh ﷺ ba’zi paytlarda kechasi ham ikki rakatdan ko‘proqni bitta salom bilan o‘qiganlari rivoyat qilingan.

Kunduzgi sunnat namozlarga kelsak — masalan:

• peshindan oldingi to‘rt rakat sunnat,

• juma namozidan keyingi to‘rt rakat,

bular haqida ham ikki xil amal sobit bo‘lgan:

• to‘rt rakatni bitta salom bilan o‘qish,

• yoki ikki rakatdan salom berib, yana ikki rakat o‘qish.

Bizning diyorimizda to‘rt rakatni bitta salom bilan o‘qish keng tarqalgan va bunga amal qilinadi. Bu mutlaqo muammo emas, chunki bu ham sunnat.

Shuningdek, ikki rakatdan salom berib, yana ikki rakat o‘qish ham to‘g‘ri. Bu ikki amal bir-birini inkor qilmaydi, ikkalasi ham sunnatda sobit bo‘lgan.

Shu sababli, bu masalada bir-birini noto‘g‘ri qilish yoki ayblash o‘rinsiz.

Vallohu a‘lam.