Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Rossiyaga borilganda yoki boshqa davlatlarga chiqilganda ham aslida insonning asl holati namoyon bo‘ladi. Alloh taolo Qur’onda odamlarning tabiatini bayon qiladi: “Qachon ularga to‘lqin bosib, halokat xavfi tug‘ilsa, Allohdan duo qilib, xolis bo‘lishga va’da berishadi. Quruqlikka chiqqach esa, Allohni unutib, zulm qilaveradilar.”

Demak, bu nafaqat Rossiyada, balki Turkiyada, Dubayda, Amerikada ham shunday. Qayerda odamga gunoh qilish imkoniyati bo‘lsa, o‘sha yerda asl siyrati ko‘rinadi. Farovonlik ham imtihon, kambag‘allik ham imtihon. Alloh ba’zan qiyinchilik bilan sinaydi, ba’zan esa boylik va kengchilik bilan sinaydi.

Bir paytlar non topolmay yurgan odam bugun millionlab pul topishi mumkin. Ammo shu boylik uning uchun qutqaruv emas, balki sinov bo‘lishi mumkin. Agar Alloh bir kasallik yuborsa yoki bir sinov bersa, o‘sha topgan boyliklari foyda bermaydi. Shuning uchun inson Alloh bergan ne’matlar aslida imtihon ekanini unutmasligi kerak.

Rossiyada yoki boshqa yirik shaharlarda gunoh qilish imkoniyatlari ko‘p. Shu sababli ko‘plab birodarlar buzilib ketishi mumkin. Lekin Alloh rahm qilgan odamlar bundan mustasno. Shuningdek, ba’zi birodarlar yomonlashmay, aksincha, yaxshilanib, toatga qaytadi. Chunki u yerda yaxshi musulmonlarni ko‘rib, ta’sirlanadi. Shunday holatlar ham ko‘p.

Biz birodarlarimizni yomon ko‘rmaymiz, balki ularning ishini yomon ko‘ramiz. Ularga yaxshilik bilan nasihat qilishimiz, yaxshi muomala ko‘rsatishimiz, lekin din masalasida qat’iy turishimiz kerak.

Shuning uchun ularga namozni tark etishning naqadar xavfli ekanini eslatib turamiz. Ammo inson sifatida hurmat, salomlashish, yaxshi munosabatda bo‘lishdan chekinmaymiz. Chunki ular ham musulmon birodarlarimiz. Balki bizning yaxshi muomalamiz va nasihatimiz orqali ular qaytib, namozga doimiy rioya qiladigan bo‘lishar.

Alloh hammamizga to‘g‘ri yo‘lda sobitlik bersin. Āmīn.