Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu savolingizning o‘zi noto‘g‘ri. Siz avvalo “Fotiha” surasini hech bo‘lmasa to‘g‘ri o‘qiydigan bo‘lishingiz kerak. Ya’ni savol berib vaqtni o‘tkazishdan ko‘ra, “Fotiha” surasining harflarini joyidan chiqara olishni o‘rganishingiz zarur. Bu — nafaqat o‘zingizning namozingizning to‘g‘ri bo‘lishi, balki imomlik qilishingiz uchun ham shart.

Agar “Fotiha”ni to‘g‘ri o‘qisangiz, albatta, jamoat bo‘lib o‘qish afzal. Ayollaringiz ham, qizingiz ham sizga iqtido qilib, jamoat savobini oladi. Lekin sizning “harfni chiqara olmayman” deb yurishingiz to‘g‘ri emas. Eng muhimi — harfni to‘g‘ri o‘qishni o‘rganish. Imkoniyati bo‘la turib, o‘rganmaslik — noto‘g‘ri.

Agar bir kishi yangi musulmon bo‘lsa yoki bilmagan bo‘lsa, unday odamga vaqt beriladi. Ammo ayrimlar yigirma yil musulmon bo‘lib yurgan bo‘lsa-da, hanuz “Fotiha”ni to‘g‘ri o‘qimaydi. O‘rganishga harakat qilmaydi, lekin dunyoviy ishlarda kerak bo‘lsa, xitoy tilini ham, koreys tilini ham, kompyuterni ham o‘rganadi. Ammo “Fotiha” surasini to‘g‘ri o‘qishga vaqt ajratmaydi. Bu — noto‘g‘ri ish.

Namoz “Fotiha”siz to‘g‘ri bo‘lmaydi. Shuning uchun hech bo‘lmasa “Fotiha”ni to‘g‘ri o‘qishni o‘rganing. Bu — har bir musulmon uchun farzi ayn bo‘lgan amal. Hozir ustoz topish ham oson: masjidda ham, internet orqali ham topishingiz mumkin.

Shuning uchun birinchi navbatda Qur’on tilovatini, harflarni to‘g‘ri talaffuz qilishni o‘rganing. Shunda namozingiz ham, imomligingiz ham to‘g‘ri bo‘ladi.

Vallohu a‘lam.