Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Alloh subḥānahu va ta‘ālā aytadi:

فَاتَّقُوا اللَّهَ مَا اسْتَطَعْتُمْ

“Allohdan qo‘lingizdan kelganicha taqvo qilinglar.”
Demak, otangiz qo‘lidan kelganicha ibodatini ado etadi. Namozda ham qancha qila olsa, shuncha kifoya.

Agar Fotiha surasini o‘qiy olsa, shu namoz uchun yetarli bo‘ladi, inshaAlloh. Har rak’atda Fotiha o‘qilishi kifoya qiladi. Agar boshqa suralarni eslay olmasa, ularga yuklanmaydi.

Agar tik tura olmasa, o‘tirib o‘qiydi. O‘tirishga ham qodir bo‘lmasa, yotgan holatda o‘qiydi. Rasululloh Muhammad ﷺ shunday deganlar:
“Tik turib o‘qi, agar qodir bo‘lmasang o‘tirib o‘qi, bunga ham qodir bo‘lmasang yotib o‘qi.”

Tahoratni qila olsa — tahorat qiladi, agar bunga ham qodir bo‘lmasa, tayammum qiladi. Shu holatda namozini o‘qiydi va undan ortiq narsa talab qilinmaydi.

Alloh taolo bu holatni gunohlarga kafforat qilsin, otangizga komil shifo bersin. Sizlarga ham chiroyli sabr ato etsin. Bu sinovlardan hammamizni yaxshi o‘tkazsin.

Darhaqiqat, kasallik — nafaqat bemor uchun, balki uning atrofidagilar: xotini, farzandlari va yaqinlari uchun ham katta imtihondir. Alloh taolo barchamizga bu sinovlarda sobitlik bersin.

Alloh xohlasa, shifo berganida, go‘yo hech narsa bo‘lmagandek bo‘lib ketadi, inshaAlloh.

Alloh taolo otangizga shifo bersin. Allohumma amin.