Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Agar avrat qisqa vaqtga ochilib qolsa-yu, darrov yopilsa, namoz botil bo‘lmaydi. Ulamolar bu haqda shunday deganlar: agar qisqa fursatda avrat ochilib qolib, tezda yopilsa, namoz buzilmaydi. Ammo avrat butun namoz davomida yoki uzun vaqt ochiq bo‘lib tursa, bu holatda namoz botil bo‘ladi.

Masalan, ayolning sochi, boldiri yoki erkakning orqa avrat joyi sajda yoki ruku’ paytida ochilib qolsa, keyin darhol yopilsa, bu namozni buzmaydi. Ammo musulmon kishi o‘z kiyimiga, namozdagi holatiga e’tiborli bo‘lishi kerak.

Ba’zilar kiyim tanlashda ehtiyotsizlik qiladi, tor yoki kalta kiyim kiyadi, shuning uchun ruku’ yoki sajdada avrat ochilib qoladi. Bu boshqa namozxonlarning e’tiborini ham chalg‘itadi, ruhiyatiga salbiy ta’sir qiladi. Bunday holatlar farosatsizlikdan dalolat beradi.

Namoz — bu Alloh huzurida turgan holatdir. Kishi Kimning huzurida turganini, nima qilayotganini tushunib, ehtirom bilan namoz o‘qishi kerak. Shunchaki harakatlar emas, balki qalbdan qilinadigan ibodat bo‘lishi kerak.

Xulosa shuki, agar avrat qisqa vaqt ochilib darrov yopilsa — namoz botil bo‘lmaydi. Ammo bu e’tiborsizlikdir, va harom ishga yaqinlashtiruvchi omildir. E’tiborli bo‘lish va avratning ochilib ketmasligi uchun to‘g‘ri kiyim tanlash lozim.

Vallohu a‘lam.