Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

“Musabbiha” — arab tilida “tasbeh aytuvchi ayol” degan ma’noni bildiradi. Bu ism lug‘aviy jihatdan joiz, ya’ni ma’nosida yomonlik yo‘q, tasbeh – Allohni poklashdir.

Agar bu ism ayolga ism sifatida qo‘yilsa, bu “Men Allohni tasbeh qiluvchi odamman” degan ma’noni bildiradi. Bu jihatdan qaralganda ismni qo‘yish mumkin.

Lekin ba’zi ulamolar bu kabi maqtovga olib boradigan ismlarni ehtiyotkorlik bilan qo‘yish kerakligini aytishadi. Chunki:

• Masalan, “Faqih” (olim), “Odil” (adolatli), “Sodiq” (rostgo‘y), “Zaynuddīn”, “Nuruddīn”, “Sharafuddīn” kabi ismlar o‘z egasini maqtov bilan tavsiflaydi.

• Bunday ismlar tazkiya (ya’ni o‘zini pok va ustun ko‘rsatish) ma’nosini bildirishi mumkin, bu esa kamtarinlikka zid bo‘lib qoladi.

Bundan tashqari, “Musabbiha” ismi xalq orasida notanish va talaffuzi biroz og‘irroq, ayniqsa o‘zbek muhitida. Shu sababli, ravonroq va tushunarliroq ism qo‘yish afzal bo‘ladi.

Qolaversa, “Musabbiha degan farishta” haqida sahih hadislarda aniq dalil mavjud emas. Shuning uchun bu ismni afzal deb aytish yoki fazilatli ism deyish ham to‘g‘ri bo‘lmaydi.

Xulosa:
Ism sifatida qo‘yish mumkin, lekin odamlar tushunadigan, oson aytiladigan va kamtarlikka yaqin ismlarni tanlash afzal.

Vallāhu a‘lam.