Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Albatta, mumkin. Insonning qalbi o‘zgaruvchan, Alloh taolo qalblarni xohlagan tarafga buradi. Himmat past bo‘lgan odam ham bir sabab, bir ta’sir bilan to‘liq o‘zgarib ketishi mumkin.

Ba’zilar tush ko‘radi, ba’zilar og‘ir voqeaga guvoh bo‘ladi, ba’zilar solih kishining nasihatidan yoki Qur’on oyatidan chuqur ta’sirlanadi — va bu bilan hayotini butunlay o‘zgartiradi. Tarixda bunday o‘zgarishlarga ega bo‘lgan juda ko‘p zotlar bor.

Masalan:

• Fuzayl ibn ‘Iyoz avval bosqinchi edi, ammo bir oyatdan ta’sirlanib, ulug‘ olimga aylandi.

• Qa‘nabiy esa ilgari ichkilikboz edi, ammo bir hadis eshitib hayotini o‘zgartirib, Imom Buxoriyning ustozlaridan biri bo‘ldi.

• Fir’avn sehrgarlarining holati — ular haqiqatni ko‘rib, darhol Muso (a.s.) tarafiga o‘tib, iymon keltirdilar va shahid bo‘lishga ham tayyor bo‘ldilar.

Shuning uchun, himmatni oshirish mumkin, lekin bu uchun eng zarur narsa – ma’rifat, ya’ni to‘g‘ri bilim, Allohni tanish va haqiqatni anglashdir. Ma’rifat kelgan joyda qalb uyg‘onadi, ruh jo‘shadi, himmat tiklanadi.

Maslahat:

• O‘zini foydali majlislarga solish

• Qur’on, hadis, solihlar siyratini o‘qish

• Suhbatlar va darslarga qatnashish

• Yaxshi do‘stlar bilan yurish

Bu amallar bilan Alloh taolo qalbga nur va harakat beradi. Shuning uchun, “men endi kech qoldim” demang. To‘g‘ri sabablar bilan himmat uyg‘onadi, va Alloh xohlagan bandasi uchun har qanday eshikni ochadi.

Vallāhu a‘lam.