Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Siz o‘zingiz aytyapsiz: bolalar ta’sirlanyapti. Bu faqat G‘arbda emas, butun dunyoda muhim muammo. Ayniqsa, telefon va o‘yinlar hozirda bolalarni butunlay o‘z domiga tortmoqda. Bu holatga qarshi kurashish kerak. Sizlar ota-ona sifatida harakat qilayotgan ekansizlar, bu juda yaxshi.

Ammo muhit masalasi bu – alohida balo. Bu haqda men ko‘p gapirganman: G‘arb diyori – bolani saqlab qolish uchun juda og‘ir joy. Agar maktabda o‘qiyotgan bo‘lsa, ularning tarbiyasi o‘sha joyda shakllanadi. Sizning gapirishingizga bola xafa bo‘ladi, sizga yuz o‘giradi. Hatto davlatga shikoyat qilsa, bolaning huquqlari deb ota-onadan olib qo‘yish holatlari ham ko‘p bo‘lgan. Agar hali bolalaringizni yoqotmagan bo’lsangizlar, unday diyorlardan ketish kerak – hali kech emas.

Siz aytgandek, islomiy maktabda o‘qiyapti desa ham, bu qanday maktab ekani muhim. Haqiqiy islomiy tarbiya beryaptimi? Agar bo‘layotgan bo‘lsa, yaxshi. Ammo menimcha, imkon bo‘lsa, musulmonlar diyoriga hijrat qilishni jiddiy o‘ylang. Bolalar musulmon muhitda ulg‘aysa, musulmon bolalar bilan do‘st bo‘lsa, ular uchun kelajakda iymonni saqlab qolish ehtimoli yuqori bo‘ladi.

Men shaxsan juda ko‘p oilalarni ko‘rdim – G‘arbda yashab, farzandini yo‘qotgan, iymondan ayrilgan oilalar. Italiyaga hijrat qilgan musulmonlar ichida hattoki butun avlod masihiy bo‘lib ketgan holatlar ham bor. Bu juda og‘riqli voqealar. Farzand musulmon bo‘lib o‘lsa – Allohga iymon bilan – bu yengil, lekin kufrda halok bo‘lish – eng katta yo‘qotish.

Shuning uchun men nasihatim – imkon boricha musulmon diyorga hijrat qilish, Allohdan madad so‘rab, bolalar tarbiyasini saqlash. O‘yinlar, internet – bu kuchli vasvasa. Ammo muhit undan ham og‘ir. Farzandingizni bugun emas, ertaga boy berib qo‘ysangiz kech bo‘ladi. Shunday ekan, bugundan chora ko‘ring. Alloh tavfiq bersin.

Vallohu a‘lam.