Sabr qiling, nasihatni davom ettiring. Alloh taolo o‘zi tavfiq bersa, in shaa Alloh hammasi yaxshilikka aylanadi. Nuh عليه السلام ham o‘g‘liga da’vat qildi. To‘fon boshlangan paytda ham uni kemaga chaqirdi: “Ey o‘g‘lim, biz bilan bo‘lgin, kemaga chiq, halok bo‘luvchilardan bo‘lma” – dedi. Ammo o‘g‘li “men toqqa chiqaman, meni suv bosmaydi” deb rad etdi.

Yana bir marta qarab ko‘ring, bu ahmoqlik emasmi? Osmon-yu yerdan suv otib chiqmoqda, hamma joyni suv bosgan. Tog‘ ham suv ostida qoladi-ku? Lekin hidoyat bo‘lmasa, inson ko‘r bo‘ladi. Nuh عليه السلامning o‘g‘li ham, xotini ham imonsiz vafot etdi. Bu — payg‘ambarning o‘z ahli uchun qilgan da’vati yetmagani emas, balki Alloh tavfiq bermaganidir.

Shu bois, siz ham da’vatingizdan to‘xtamang. Allohdan hidoyat so‘rab duo qiling, sabr bilan maslahat bering. Qazo qilgan bo‘lsa ham, demak u hali namozni butunlay tark qilmagan. Shuning uchun umidni uzmang.

Alloh taolo qalbining qulfining kalitini bersa, birdan ochilib ketadi, in shaa Alloh. Qalb ochilishi bilan hammasi o‘zgaradi. Allohdan so‘rab, tinimsiz duo qiling, halol, yumshoq da’vat bilan yondashing. Kun kelib, o‘g‘lingiz yaxshi tomonga o‘zgaradi, in shaa Alloh.

Vallohu a‘lam.