Bismillah,

Alloh ta’ologa hamdlar, undan keyin payg’ambar bo’lmaydigan payg’ambarga, uning oilasi, sahobalari va to qiyomatgacha ularga yaxshilikda ergashganlarga salavot va salomlar bo’lsin.

Haqiqatda, Molikiylarda qo‘l bog‘lamasdan, balki tushirib namoz o‘qish mashhur amal hisoblanadi. Madinaga yoki Makkaga haj va umra uchun borganlar ham buni kuzatgan bo‘lishlari mumkin. Molikiy mazhabi keng tarqalgan hududlardan kelgan hojilar qo‘llarini tushirib namoz o‘qiydilar, bog‘lamaydilar. Hatto imom Allohu Akbar desa, odamlar qo‘l bog‘lashsa, ular tushirib o‘qiydi.

Bunga ochiq bir dalil kelmagan. Hatto Imom Molik rahimahulloh “Muvaṭṭo” kitobida: “Odamlar namozda o‘ng qo‘lini chap qo‘l ustiga qo‘yishga buyurilardilar”, deb rivoyat qilganlar.

Ba’zi Imom Molikning as’hoblari esa buni makruh deb ta’kidlaganlar. Nafl namozlarda joiz, lekin farz namozlarda makruh deb aytganlar. Sababi, bu qo‘l bog‘lagan kishi suyanganday bo‘lib qolishidan ehtiyot qilish uchundir, deyishgan. Ammo Molikiy mazhabining yirik olimlari Imom Molikning gaplarini tahlil qilib, bu amaliyot yaxshi sanalgan deb xulosa chiqarganlar va makruh emas deb ta’kidlaganlar.

Ba’zilar esa Imom Molik sinovga uchrab, qamoqda kaltaklanganlaridan so‘ng qo‘llarini bog‘lay olmaganliklari sababli tushirib o‘qiganlarini dalil qilib olishgan. Lekin hadislarning barchasida “o‘ng qo‘l chap qo‘l ustiga qo‘yiladi”, deb ochiq rivoyat qilingan. Imom Buxoriy ham buni rivoyat qilganlar.

Shuning uchun ham qo‘lni tushirib namoz o‘qish sunnat deyilmaydi va amal qilinmaydi. Agar kimdir buni o‘ziga dalil qilib olgan bo‘lsa, ortiqcha bahs-munozaraga kirishmaslik lozim. Qo‘llarni bog‘lash sunnatga ko‘proq muvofiq sanaladi. Lekin kimdir qo‘lini tushirib o‘qisa ham, namozi botil bo‘lmaydi, chunki bu Molikiy mazhabida ruxsat etilgan amaldir.

Vallohu A’lam.