Bismillah,

Alloh taologa hamdlar, undan keyin payg‘ambar bo‘lmaydigan Payg‘ambarga, uning oilasi, sahobalari va to qiyomatgacha ularga yaxshilikda ergashganlarga salavot va salomlar bo‘lsin.

Alloh taolodan barcha mazlum birodarlarimizga najot so‘raymiz. Alloh tez orada chiqib ketishlaringizni oson qilsin va holatingizni yaxshilasin.

Ahli kitob yurti bo‘lsa va taomlarga mol yoki tovuq go‘shti qo‘shilsa, lekin qanday so‘yilgani noma’lum bo‘lsa, aslida shariat bo‘yicha ahli kitoblarning so‘ygan jonlig‘i musulmonlar uchun halol hisoblanadi. Alloh taolo Qur’on Karimda:

“Ahli kitoblarning taomi sizlar uchun haloldir…” (Moida, 5:5) – deydi.

Bu oyat tafsirida Ibn Abbos (roziyallohu anhu) va boshqa sahobalar ahli kitoblarning halol taomi deganda ularning so‘ygan hayvonlari nazarda tutilganini aytganlar.

Ahli kitobga yahudiylar va nasroniylar kiradi. Boshqa mushrik yoki dinsizlarning so‘ygan hayvoni esa musulmonlar uchun halol hisoblanmaydi. Ammo ahli kitob o‘z dinining shartlariga amal qilib so‘ygan bo‘lsa, uning go‘shti halol sanaladi. Musulmonlar agar Bismillahni aytmay so‘ysa yoki tok bilan o‘ldirib so‘ysa, halol deyilmaydi. Endi qanday qilib diniga amal qilmaydigan ahli kitobning so‘ygani halol bo‘lsin?

Yahudiylar bu borada juda qat’iy bo‘lib, ularning shariatiga amal qilib so‘ygan jonlig‘i halol bo‘lish ehtimoli yuqori.

Biroq nasroniylarning ko‘pchiligi hozirda o‘z shariatlariga rioya qilmay qo‘ygan. Shuning uchun ularning go‘shti shubhali bo‘lishi mumkin. Agar go‘shtning qanday so‘yilgani aniq ma’lum bo‘lmasa va u taomning manbasi haqida ishonchli ma’lumot yo‘q bo‘lsa, musulmonlar uni iste’mol qilishi mumkin. Lekin agar o‘sha yurtda odatda hayvonlar harom yo‘llar bilan so‘yilishi, masalan, elektr toki bilan o‘ldirilishi keng tarqalgan bo‘lsa, bunday go‘shtni yemaslik ehtiyotkorlik bo‘ladi.

Qamoq sharoitida boshqa tanlov yo‘qligi sababli, agar go‘shtning harom yo‘l bilan so‘yilganiga aniq dalil bo‘lmasa, Bismillah deb iste’mol qilish joiz bo‘ladi, inshaAlloh. Agar tashqarida bo‘lganingizda boshqa halol taomlar mavjud bo‘lsa, ularga afzallik berish yaxshiroq bo‘ladi.

Vallohu a’lam.