Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

To‘g‘ridan-to‘g‘ri “senga baraka bo‘lmaydi” deb aytish qiyin. Lekin xo‘jayiningiz aytayotganidek, sunnatga muvofiq — xuftondan keyin uxlash va tunning yarmida turish — eng afzal yo‘ldir.

Masalan, agar bolalaringiz erta uxlasa, sizda ham imkon bo‘lsa, xuftondan keyin darhol uxlab, tun yarmida turishga odatlanish juda yaxshi. Sog‘liq nuqtayi nazaridan ham, tibbiy tomondan ham bu eng ma’qul yo‘l sanaladi. Mutaxassislar inson uchun eng foydali uyqu aynan xuftondan keyingi uyqu ekanini, bu vaqtda gormonlar ishlab chiqishi va tananing dam olishi tabiiy muvofiqlikka ega ekanini aytishadi.

Agar siz xuftondan keyin uxlab, saharning oxirgi uchdan birida uyg‘onib dars qilsangiz, bu vaqt juda barakali bo‘ladi. Bolalar bu vaqtda uyg‘onmasligi ham mumkin. Siz ham yetarlicha uxlab olgan bo‘lasiz, bomdodga ulgurasiz, hatto undan keyin ham dars qilishga vaqt topasiz.

Siz kechasi dars qilganingizda baribir biror vaqtda uxlaysiz — masalan, kechasi ikki yoki uchgacha dars qilib, undan keyin uxlasangiz ham taxminan 4-5 soat uxlaysiz. Shu uxlash vaqtingizni kechadan saharga ko‘chirsangiz, ya’ni xuftondan keyin uxlab, tun yarmida uyg‘onib dars qilsangiz, o‘sha ilm barakaliroq bo‘ladi, in shā Alloh.

Shuningdek, sahar vaqtining o‘zi Qur’on va ilm uchun eng barakali payt hisoblanadi. Hattoki tahajjud o‘qishga ham muvaffaq bo‘lasiz. Ilmingizda ham baraka bo‘ladi, uyda ham osoyishtalik saqlanadi.

Xulosa: Sizda imkon bo‘lsa, xuftondan keyin uxlab, tunning yarmida turishga harakat qiling. Bu sunnatga muvofiq, sog‘lom turmush va barakali ilm yo‘lidir.

Vallāhu a‘lam.