Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu masalada ayolning jismoniy holati va farzandlarga zarar yetish ehtimoli asosiy mezondir. Agar ro‘za tutish homilaga yoki emizilayotgan bolaga zarar yetkazishi aniq bo‘lsa yoki shifokor tavsiya qilmasa — unda ro‘za tutmasligi kerak. Chunki shariatda o‘ziga yoki boshqalarga zarar keltirish halol emas.

Ba’zi ayollar baquvvat bo‘lib ro‘za tuta olishadi, ba’zilar esa ojiz bo‘lishi mumkin — bu har bir ayolga qarab baholanadi. Ayolingizga ro‘za sut kamayishi yoki homilaga salbiy ta’sir qilayotgan bo‘lsa, sizning e’tirozingiz o‘rinli va unga itoat qilish joiz.

O‘tgan yilgi va kelayotgan Ramazon ro‘zalari qazo bo‘lib ketsa ham, bu umidsizlikka sabab emas. Ro‘zalarni sog‘ayganidan keyin asta-sekin tutib oladi, Alloh yordam beradi. Hatto ba’zi ayollar 5–10 yillik qazo ro‘zalarni keyin tutgan holatlar ham bo‘lgan.

Agar keyinchalik ham sog‘lig‘i yoki quvvati bo‘lmasa, fidya (ya’ni har bir kun uchun miskinga taom berish) beriladi. Demak, bu masalaning shar’iy yechimi bor.

Lekin hozirgi holatda na o‘ziga, na bolaga zarar qilmasligi lozim. Asosiysi, Allohdan qo‘rqib, ehtiyotkorlik bilan harakat qilishdir.

Vallāhu a‘lam.