Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Ha, bu masala murakkab. Har doim ham muammo gunoh tufayli bo‘lmaydi. Balki uylanishning qiyin bo‘lishi boshqa sabablarga borib taqaladi. Masalan, haqiqatan ham yaxshi qiz topilmayotgan bo‘lishi mumkin, yoki do‘stingiz o‘ziga juda yuqori talablar qo‘yib qo‘ygan bo‘lishi mumkin. Ba’zilar o‘zlari uchun mukammal idealni tasavvur qilib olishadi — u chiroyli bo‘lsin, oq bo‘lsin, uzun bo‘lsin, hech erga tegmagan bo‘lsin, shunaqa bo‘lsin, bunday bo‘lsin… Ammo real hayotda bunday “pari”ni topish juda qiyin, hatto imkonsizdir.

Inson o‘zi kimligini, qanday maqomda turganini bilib, o‘ziga mos, shariat doirasidagi nomzodlarni izlashga harakat qilishi kerak. Hamma inson ham nuqsonsiz emas. Agar bir-birlarining nuqsonlarini ko‘rib, kechira olishsa va birga yashashni istashsa, bu oilaning barakasi bo‘ladi.

Shuningdek, uylanish masalasida bevalarni e’tibordan chetda qoldirmaslik kerak. Ko‘p hollarda, erdan chiqqan ayol – tajribali, diyonatli, soliha bo‘lishi mumkin. O‘zi ham Rasululloh ﷺ Xadicha onamizga uylanganlarida, u kishi ikki marta turmush qurgan, farzandli, Rasulullohdan yoshi katta ayol edilar. Shunga qaramay, Rasululloh ﷺ u kishini hurmat bilan qabul qilganlar.

Jabir ibn Abdulloh ham yosh bo‘lishiga qaramay, o‘zidan katta ayolga uylangan. Rasululloh ﷺ unga nega yosh qizga uylanmading, deb so‘raganlarida, Jabir: “Menga otamdan to‘qqizta singlim meros qoldi. Ularning tarbiyasi uchun yosh ayol emas, yoshi katta va tajribali ayol kerak bo‘ldi”, degan.

Yana bir muhim narsa shuki, biz sinovda yashaymiz. Ba’zi narsalarning kechikishi — sinov bo‘lishi mumkin. Mol topilmasa, uni “gunohim uchun Alloh bermayapti” demaymiz-ku. Xuddi shunga o‘xshab, nikohda kechikish ham har doim gunoh natijasi bo‘lmaydi. Balki sabr qilish, duo qilish, harakat qilish kerak. Alloh taolo rizq qilib qo‘ygan bo‘lsa, nasib qiladi, in shā Alloh.

Natijada, muammo har doim tashqaridan emas, balki o‘zimizdan ham bo‘lishi mumkin. Talablarni real hayotga moslashtirib, sabr bilan va tafakkur bilan yo‘l tutish kerak. Shunda Alloh taolo o‘zining hikmati bilan eng yaxshisini nasib qiladi.

Vallāhu a‘lam.