Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu masala ijtihodiy masala bo‘lib, zamon va holatga qarab hukmi o‘zgaradi. Ba’zi holatlarda, ayniqsa chet elda yashayotgan musulmonlar uchun, tibbiy sug‘urta zaruratga aylanishi mumkin.

Agar siz yashayotgan hududda tibbiy xizmatlar juda qimmat bo‘lsa, ya’ni birgina oddiy muolaja yoki shifokorga murojaat qilish minglab pulga tushadigan bo‘lsa, unda bu holat “zarurat” doirasiga kiradi. Zarurat holatlarida esa, asosan harom bo‘lgan narsalar ham vaqtincha joiz bo‘lishi mumkin, bu shariat qoidasi.

Masalan, kimdir birgina qo‘li yoki tish muolajasi uchun minglab dollar to‘lashi kerak bo‘lsa, bu inson moliyaviy jihatdan qiynaladi. Shariatda esa molni behuda isrof qilish, uni zoya qilish man qilingan. Sug‘urta orqali bu kabi katta moliyaviy yo‘qotishlarning oldini olish mumkin bo‘lsa, bu uni joiz qiladi.

Ayniqsa ba’zi davlatlar, masalan Rossiya, AQSh, Yevropa davlatlarida, tibbiy sug‘urtasiz yashash deyarli imkonsiz – na davolanish, na bolani ro‘yxatdan o‘tkazish, na muolajalarni olish mumkin bo‘ladi. Ba’zida hatto yashash uchun ruxsatnoma olishda ham sug‘urta majburiy qilinadi. Bunday holatlarda bu “majburiy sug‘urta” sanaladi.

Shuning uchun agar siz sug‘urtasiz holda muntazam to‘lov qilib borishga moliyaviy imkoningiz bo‘lmasa va bu sizga og‘ir tushsa, unda o‘zingizni, oilangizni moliyaviy va sog‘liq jihatdan himoya qilish uchun sug‘urta qilish shar’an joiz bo‘ladi.

Ammo imkoningiz bo‘lsa va har doim shifokorga borishga to‘lov qilib yurish sizga qiyinchilik tug‘dirmasa, unda sug‘urtasiz yurish afzalroq hisoblanadi.

Xulosa:
Agar sog‘liqni saqlash xizmatlari qimmat bo‘lsa, va sug‘urta qilish zaruratga aylangan bo‘lsa – bu holatda sug‘urta qilish shar’an joiz. Chunki bu molni asrash, oila xavfsizligini ta’minlash maqsadida amalga oshiriladi.

Vallohu a‘lam.