Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

To‘shak masalasi er-xotin orasidagi o‘zaro haqlardan biridir. Er ayolini chaqirsa, ayol shariatga ko‘ra sababsiz bu chaqiriqni rad qilmasligi kerak. Bu, avvalo, ayollik vazifa sanaladi. Chunki qanday qilib er uy-joy, oziq-ovqat bilan ta’minlashi shart bo‘lsa – ayol ham erining to‘shakdagi haqiga javob berishi shartdir. Erning yaxshi gapirish yoki erkalatishiga bog‘liq emas bu haq – bu ayol zimmasidagi majburiyatdir.

Agar ayol erining munosabatidan ranjib, “meni qadrlasin”, deb qarshi chiqsa, bu ishi to‘g‘ri bo‘lmaydi. Chunki bu yo‘l bilan erning qalbini yumshatish o‘rniga, aksincha, undan uzoqlashib ketishi mumkin. Shayton ham bu kabi arazlarni quvvatlab, er-xotin orasini yanada sovitadi.

Ayol kishi mehrni xizmat bilan, muloyimlik bilan, sabr bilan qozonadi. Oqila ayol shunday xizmat ko‘rsatadiki, eri o‘z-o‘zidan unga mehribon bo‘lib qoladi. Eri bilan ko‘p xizmat qilgan ayol – erkalatishga ham, hurmatga ham loyiq bo‘ladi. Ayol kishi eshikni ochmaslik, telefonga javob bermaslik, “bugun kayfiyatim yo‘q” deyish kabi yo‘llar bilan o‘z qadrini oshirmoqchi bo‘lsa – bu noto‘g‘ri va shariatda yo‘q holatdir.

Bunday ishlar ayolni la’natga uchratishi mumkin. Rasululloh ﷺ aytdilar:

“Erini to‘shakka chaqirganida rad qilgan ayolga osmon ahli la’nat aytadi.”

Ammo shuni ham unutmaslik kerakki, er ham o‘zining vazifalarini bajarishi – mehribon bo‘lishi, mahrini berishi, hurmat ko‘rsatishi lozim. Agar ayol haq-huquqidan bebahra qolsa, er zulm qilgan bo‘ladi.

Demak, ayol sabr, xushmuomalalik va aqllilik bilan erining mehrini qozonadi. G‘azab bilan, qarshilik bilan emas. Bunday holatlarda oilaviy muvozanat buzilmasligi uchun har ikkala tomon o‘z vazifalarini ado etishi lozim.

Vallohu a‘lam.