Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salavot va salomlar bo‘lsin.

Ha, sizning bu mulkka haqqingiz bor. Agar uy qurilishi uchun qo‘shilgan pulingiz aniq bo‘lsa, misol uchun yarmi sizning mablag‘ingizga to‘g‘ri kelgan bo‘lsa, uyning yarmiga sizning shariy haqqingiz bor. Qolgan yarmi esa eringizniki bo‘ladi.

Siz bu uyni farzandlaringiz bilan yashash uchun barpo qilgansiz, va shu uyda turibsiz, farzandlaringizni tarbiya qilyapsiz. Bu haqingizni talab qilish – gunoh emas.

Eringiz: “Uy senga bo‘ladi,” deb va’da bergan bo‘lsa, bu – axloqiy jihatdan ham, shariatga ko‘ra ham va’dasini bajarishi lozimligini bildiradi. Ayniqsa, sizdan farzandlari bo‘lsa, adolat yuzasidan bu mulkni sizga yoki o‘g‘lingiz nomiga o‘tkazib berish mantiqan va dinan ma’qul.

Lekin bu kabi masalalar ur-sol bilan emas, yaxshi muomala, sokin so‘z, sabr va tushuntirish bilan hal etilishi kerak. O‘zimizda maqol bor:

“Yaxshi so‘z bilan ilon inidan chiqadi.”

Agar siz bu uyning hech bo‘lmaganda o‘zingiz haqingizga to‘g‘ri kelgan qismini – masalan, yarmisini – “shu mening nomimga o‘tkazilsin” deb aytsangiz, bu sizning haqlaringiz doirasida bo‘ladi. Buning uchun gunohkor bo‘lmaysiz, balki ehtiyotkor va mas’uliyatli bo‘lgansiz, deyiladi.

Chunki hayotda nima bo‘lishini faqat Alloh biladi. Ertaga Alloh saqlasin, biror holat yuz bersa, siz rasmiy hujjat bo‘lmagan uydan farzandlaringiz bilan chiqib ketishga majbur bo‘lib qolishingiz mumkin.

Eringiz adolatli inson bo‘lishga harakat qilayotgan bo‘lsa, u sizni va o‘z farzandlarini ko‘chaga chiqarib qo‘ymas, deb umid qilamiz. Lekin siz oldindan ehtiyot choralarini ko‘rishingiz – oqilona ish bo’ladi.

Xulosa shuki: siz bu uyda ishlatgan mablag‘ingizga yarasha haqqa egasiz. Ammo bu haqiqatni muloyimlik bilan, tushuntirish yo‘li bilan eringizga bayon qilishingiz eng to‘g‘ri yo‘ldir.

Vallohu a‘lam.