Bismillah, was-salatu was-salamu ‘ala Rasulillah, amma ba’d.

Bunday kitobni o‘qish mumkin, lekin albatta ustoz bilan birga o‘qish kerak. Haqiqat shuki, Qur’on tarjimasida ko‘p tushunmovchiliklar kelib chiqadi. Ko‘p savollar, ko‘p shubhalar tug‘iladi. Chunki Qur’on oyatlari qisqa, ammo mazmun jihatdan chuqur va murakkabdir. Uni to‘g‘ri tushunish uchun ilm kerak, tafsir, hadislar bilan birgalikda tushunish lozim. Aks holda, har kim o‘zicha tushunib, noto‘g‘ri xulosalar chiqarishi mumkin.

To‘g‘ri, foyda olasiz, masalan, o‘qiganda biror narsani tushunishingiz mumkin, lekin baribir ustoz bilan o‘qilgan foydaliroq bo‘ladi. “O‘qimanglar” demaymiz, lekin ustoz bilan birga o‘qish afzal, chunki noto‘g‘ri tushunish, zid joylarni anglay olmaslik holatlari ko‘p uchraydi.

Shuning uchun har doim bilimli kishi, ya’ni ustoz bilan birga o‘qish tavsiya qilinadi. Agar ustoz topolmasangiz, o‘qishni to‘xtatish shart emas. Ammo shubhali joylarga duch kelsangiz, ahli zikir, ya’ni ilm egalari bilan maslahatlashib, tushunib olish kerak. Aks holda, shayton qalbingizga waswasa soladi: “Qur’onda o‘zaro zid gaplar bor”, degan fikrlar keladi. Bu esa xatodir.

Shuningdek, Qur’on oyatini o‘qib: “Mana shu oyatni o‘qidim, shunga amal qilaman”, deb o‘zingizcha xulosa chiqarmang. Albatta, u oyat bo‘lishi mumkin, lekin uni umumiy ma’noda emas, balki xos ma’noda tushunish lozim. Yoki u mutlaq bo‘lib, muqayyad bo‘lishi ham mumkin. Bularning barchasini ulamolar biladi. Vallohu a’lam.