Bismillah, vassalatu vassalamu ‘ala Rasulillah, amma ba’d.
Agar aka man qilayotgan bo‘lsa, o‘shanga yarasha sharoitni ham qilib berishi kerak. Ya’ni, uyda o‘tirgan joyda o‘qiy oladigan tarzda bir ustoz olib keladimi yoki boshqa qandaydir sharoit yaratadimi — biror imkon yaratishi lozim.

Agar bu imkoniyat mavjud bo‘lmasa, ilm olish farz bo‘ladi. Ayniqsa, Qur’onni o‘rganish, uni to‘g‘ri o‘qishni (tajvidini) o‘rganish — farzi ayn hisoblanadi. Farzi ayn bo‘lgan holatda esa, ilm olish uchun ruxsat so‘rash shart emas.

Lekin bu: “Ruxsat so‘ramay ketaveraylik” degani emas. Bu holatda tushuntirish kerak. Akaga aytiladi: “Men ilm olishim farz, siz man qilsangiz, hech qanday imkon ham yaratmayotgan bo‘lsangiz, bu to‘g‘ri emas.” Kelishib, o‘rtacha bir yechim topish kerak. Yaxshilikdan chiqmaslik lozim.

Rasululloh (sallallohu alayhi vasallam) aytganlar:

“Ayollar masjidga chiqaman desa, ularni man qilmanglar” (hadis).
“La tamna’u imaa Allahi min masajidillah” — ya’ni, “Ayollarni Allohning masjidlaridan man qilmanglar.”

Demak, masjidga chiqishdan man qilinmasa, ilm majlisiga chiqishdan ham man qilinmasligi kerak. Chunki ayollar ilmni qayerdan o‘rganadi? Agar Qur’on o‘rganish uchun boshqa iloji bo‘lmasa, akasining bunga qarshiligi noto‘g‘ri bo‘ladi. Huquqiy jihatdan qaralganda, ruxsatsiz ham borish mumkin, lekin bu doimo shunday qilish kerak degani emas.

Aqlli va oxiratni o‘ylaydigan aka bu holatda imkon yaratib berishi kerak.
Vallohu a’lam.