Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Faqihlar bu masalada shunday deganlar: agar siz avval mashinani sotib olib, mulkingizga aylantirib, keyin boshqaga sotsangiz, bu shariatga muvofiq bo‘ladi.

Lekin agar sizning kasbingiz mashina savdosi emas bo‘lsa, bunday ishni qilmasligingiz kerak, deb aytamiz. Ya’ni, bu o‘zingizning asosiy ishingiz bo‘lishi lozim. Agar siz mashina savdosi bilan shug‘ullansangiz, va biror mijoz kelib: “Menga falon rusumdagi mashina kerak,” desa, siz: “Bizda aynan u yo‘q, lekin topib beramiz,” deb bozordan olib kelib, ustiga foyda qo‘shib unga sotsangiz — bu halol hisoblanadi, chunki bu sizning kasbingiz.

Qandayki telefon sotuvchi telefon bilan, kompyuter sotuvchi kompyuter bilan ishlaydi, xuddi shunday mashina savdosi bilan shug‘ullanuvchi odam mashina bilan ishlashi tabiiy.

Ammo agar biror kishi mashina ham, kompyuter ham emas, oddiygina pul olib: “Menda 10 ming dollar bor, sen menga mashina olib ber, keyin men senga 15 ming qaytaraman,” degan mazmunda murojaat qilsa, va siz faqat hujjatda mashina nomini kiritib, aslida pul muomalasini foizli ko‘rinishda yuritmoqchi bo‘lsangiz — bu halollik niqobi ostidagi harom bitimga o‘xshab qoladi. Bu holat Qur’onda qoralangan:

“Shanba kuni baliq ovlamanglar,” degan buyruqni aylanib o‘tgan qabilalarning makriga o‘xshab qoladi.

Shuning uchun bunday masalalarda taqvo bilan yondashish lozim. Shariatga to‘g‘ri keladigan ish — o‘zingiz halol qilib yuritayotgan haqiqiy kasbingizni davom ettirishdir.

Agar sizning ishingiz mashina savdosi bo‘lsa, mashinani oldin o‘zingiz to‘liq sotib olib, mulkingizga aylantirganingizdan keyin boshqalarga sotsangiz — bu halol savdo bo‘ladi.

Vallāhu a‘lam.